# یەکەمین پەیامی ئایەتوڵڵا سەید موجتەبا حوسەینی خامنەیی، ڕێبەری شۆڕشی ئیسلامی

- سەید موجتەبا حوسەینی خامنەیی
- بڵاوکراوەتەوە: 12ی ئازاری 2026 (2026-03-12)
- URL: https://mojtabakhamenei.world/ckb/messages/first-message-leader-islamic-revolution/
- Persian original: https://mojtabakhamenei.world/fa/messages/first-message-leader-islamic-revolution/

بسم الله الرّحمن الرّحیم
بە ناوی خوای بەخشندەی میهرەبان

مَا نَنسَخ مِن آیَةٍ اَو نُنسِها نَأتِ بِخَیرٍ مِنها اَو مِثلِها. (1)
هەر ئایەتێک لابەرین یان لە بیری ببەینەوە، باشتر لەو یان وێنەی ئەو دەهێنین. (قورئان، بەقەرە ٢: ١٠٦)

اَلسَّلامُ‌عَلَیكَ یا داعِیَ اللّهِ وَ رَبّانِیَّ آیاتِهِ اَلسَّلامُ عَلَیكَ یا بابَ اللّهِ وَ دَیّانَ دینِهِ اَلسَّلامُ عَلَیكَ یا خَلیفَةَ اللّهِ و ناصِرَ حَقِّهِ اَلسَّلامُ عَلیكَ یا حُجَّةَ ا‌للّهِ وَ دَلیلَ اِرادَتِه اَلسَّلامُ عَلَیكَ اَیُّهَا المُقَدَّمُ المَأمول اَلسَّلامُ عَلَیكَ بِجَوامِعِ السَّلام. اَلسَّلامُ‌عَلَیكَ یا مَولایَ صاحِبَ الزَّمان.
سڵاوت لێ بێت ئەی بانگخوازی خوا و زانای خوایی ئایەتەکانی؛ سڵاوت لێ بێت ئەی دەروازەی خوا و دادوەری ئایینەکەی؛ سڵاوت لێ بێت ئەی جێنشینی خوا و یارمەتیدەری حەقەکەی؛ سڵاوت لێ بێت ئەی بەڵگەی خوا و ڕێنیشاندەری ویستەکەی؛ سڵاوت لێ بێت ئەی پێشخراوی هیوا پێبەستراو؛ سڵاوت لێ بێت بە هەموو جۆرەکانی سڵاو. سڵاوت لێ بێت ئەی گەورەم، ئەی خاوەنی سەردەم.

لە سەرەتای قسەکانمدا دەبێت بە بۆنەی شەهیدبوونی دڵسووتێنەری ڕێبەری پایەبەرزی شۆڕش، خامنەییی خۆشەویستی دانا، سەرەخۆشی لە گەورەکەم (خوای گەورە لە دەرکەوتنی پەلە بکات) بکەم، و داوای دوعای خێر لەو زاتە بکەم بۆ یەکە یەکەی گەلی گەورەی ئێران، بەڵکوو بۆ هەموو موسڵمانانی جیهان و هەموو خزمەتگوزارانی ئیسلام و شۆڕش و فیداکاران و ماوەکانی شەهیدانی بزووتنەوەی ئیسلامی و بە تایبەتی جەنگی دواییی، و بۆ خودی ئەم بەندە هەژارە.

بەشی دووەمی قسەکانم لەگەڵ گەلی گەورەی ئێرانە. سەرەتا دەبێت بە کورتی هەڵوێستی خۆم سەبارەت بە دەنگی ئەنجومەنی بەڕێزی خوبرەگان ڕوون بکەمەوە. ئەم خزمەتکارەتان، سەید موجتەبا حوسەینی خامنەیی، هاوکات لەگەڵ ئێوە و لە ڕێگەی تەلەفزیۆنی کۆماری ئیسلامییەوە ئاگاداری ئەنجامی دەنگی ئەنجومەنی بەڕێزی خوبرەگان بووم. بۆ من پاڵدانەوە لەسەر ئەو جێگایەی کە شوێنی دانیشتنی دوو پێشەوای پایەبەرز، خومەینیی گەورە و خامنەییی شەهید بووە، کارێکی قورسە؛ چونکە ئەم کورسییە پێشینەی دانیشتنی کەسێکی هەیە کە پاش زیاتر لە شەست ساڵ تێکۆشان لە ڕێگای خوادا و دەستبەرداربوون لە جۆرەها چێژ و ئاسوودەیی، بووەتە گەوهەرێکی درەوشاوە و ڕوخسارێکی دیار، نەک تەنیا لە سەردەمی ئێستادا، بەڵکوو لە درێژایی مێژووی فەرمانڕەوایانی ئەم وڵاتەدا. هەم ژیان و هەم جۆری مردنی ئەو تێکەڵ بوو لەگەڵ شکۆ و سەربەرزییەک کە سەرچاوەی پشتبەستن بە حەق بوو.

من ئەم بەختەم هەبوو کە پاش شەهیدبوونی، تەرمەکەیم ببینم؛ ئەوەی بینیم چیایەک بوو لە سەختی و پتەوی؛ و بیستم کە مستی دەستە ساغەکەی گرێ دابوو. سەبارەت بە لایەنە جیاوازەکانی کەسایەتیی ئەو، شارەزایان دەبێت بۆ ماوەیەکی درێژ شت بڵێن. لەم دەرفەتەدا بەم کورتەیە واز دەهێنم و وردەکارییەکان بۆ هەلومەرجی گونجاوی دیکە جێ دەهێڵم. ئەمەیە هۆی قورسیی پاڵدانەوە لەسەر کورسیی ڕێبەری پاش کەسێکی وەها. پڕکردنەوەی ئەم بۆشاییە تەنیا بە یارمەتیخواستن لە خوای پەروەردگار و یارمەتیی ئێوەی گەل دەلوێت.

لە درێژەدا پێویستە جەخت لەسەر خاڵێک بکەمەوە کە پەیوەندییەکی ڕاستەوخۆی بە کرۆکی قسەکانمەوە هەیە؛ ئەو خاڵە ئەوەیە کە یەکێک لە هونەرەکانی ڕێبەری شەهید و پێشینە گەورەکەی، هێنانە ناوەوەی خەڵک بوو بۆ هەموو بوارەکان و بەردەوام بینایی و ئاگاییدان پێیان، و لە بواری کردەوەدا پشتبەستن بە هێزی ئەوان. ئەوان بەم شێوەیە مانای ڕاستەقینەی جەماوەر و کۆماریەتییان هێنایە بواری کردەوە و لە قووڵایی گیانیشەوە باوەڕیان پێی هەبوو. کاریگەریی ئاشکرای ئەمە لەم چەند ڕۆژەدا بینرا کە وڵات بێ ڕێبەر و بێ فەرماندەی گشتیی هێزەکان بوو. بینایی و ژیریی گەلی گەورەی ئێران لە ڕووداوی دواییدا و خۆڕاگری و ئازایەتی و ئامادەبوونی، دۆستی خستە ستایش و دوژمنی خستە سەرسوڕمان. ئەوە ئێوەی گەل بوون کە ڕێبەرایەتیی وڵاتتان کرد و دەسەڵاتەکەیتان مسۆگەر کرد.

ئەو ئایەتەی کە لە سەرەتای ئەم نووسراوەدا هێنام، بەو مانایەیە کە هیچ نیشانەیەک لە نیشانە خوداییەکان نییە کە یان کاتەکەی تەواو بێت یان لە بیر بکرێت، مەگەر ئەوەی لە لایەن خوای پەروەردگارەوە (جلّ و علا) وێنەی ئەو یان باشتر لەو لە جێگەیدا دابنرێت. بۆنەی بەکارهێنانی ئەم ئایەتە پیرۆزە ئەوە نییە کە ئەم بەندەیە لە ئاستی ڕێبەری شەهیددا بم، چ بگات بەوەی بمەوێت لەو باشتر دابنرێم؛ بەڵکوو مەبەست لە هێنانی ئایەتە پیرۆزەکە، ڕاکێشانی سەرنجە بۆ ڕۆڵی بەجێ و بەرچاوی ئێوەی گەلی خۆشەویست. ئەگەر ئەو نیعمەتە گەورەیە لە ئێمە سەندرایەوە، لە جێگەیدا جارێکی دیکە ئامادەبوونی عەممارئاسای گەلی ئێران بەم سیستەمە بەخشرا. ئەمە بزانن: ئەگەر هێزی ئێوە لە مەیداندا دەرنەکەوێت، نە ڕێبەری و نە هیچ یەکێک لە دەزگا جیاوازەکان، کە پێگەی ڕاستەقینەیان خزمەتکردنە بە خەڵک، کارایی پێویستیان نابێت.

بۆ ئەوەی ئەم مانایە باشتر بێتەدی، یەکەم: دەبێت یادی خوای پەروەردگار (تبارک و تعالی) و پشتبەستن بەو و پەنابردن بۆ نوورە پاکەکانی مەعسوومەکان (درودی خوا لەسەر هەموویان بێت)، وەک ئیکسیری مەزن و کیمیایەکی دەگمەن سەیر بکرێت کە مسۆگەرکەری جۆرەها کرانەوە و سەرکەوتنی یەکجاری بەسەر دوژمندایە. ئەمە ئیمتیازێکی گەورەیە کە ئێوە خاوەنین و دوژمنانتان لێی بێبەشن.

دووەم: نابێت لە یەکیەتیی نێوان تاک و چینەکانی گەلدا، کە بە زۆری لە کاتی تەنگانەدا دەرکەوتنێکی تایبەتی هەیە، کەلێنێک دروست بێت. ئەمەش بە چاوپۆشین لە خاڵە جێی ناکۆکییەکان بەدەست دێت.

سێیەم: دەبێت ئامادەبوونی کاریگەر لە مەیداندا بپارێزرێت؛ چ بەو شێوەیەی کە لەم ڕۆژ و شەوانەی جەنگدا نیشانتان دا، و چ بە شێوەی جۆرەها ڕۆڵگێڕانی کاریگەر لە بوارە جیاوازەکانی کۆمەڵایەتی، سیاسی، پەروەردەیی، کولتووری و تەنانەت ئەمنیدا. گرنگ ئەوەیە کە ڕۆڵی دروست، بێ زیانگەیاندن بە یەکیەتیی کۆمەڵایەتی، بە باشی تێبگەیشترێت و تا ئەو جێگایەی دەکرێت جێبەجێ بکرێت. یەکێک لە ئەرکەکانی ڕێبەری و هەندێک بەرپرسی دیکە، بیرخستنەوەی هەندێک لەم ڕۆڵانەیە بە تاک یان چینەکانی کۆمەڵگە. بۆیە گرنگیی ئامادەبوون لە ڕێوڕەسمی ڕۆژی قودسی ١٤٤٧ بیر دەخەمەوە، کە دەبێت توخمی دوژمنشکێنی تێیدا جێی سەرنجی هەمووان بێت.

چوارەم: لە یارمەتیدان و هاوکاریی یەکتر کەمتەرخەمی مەکەن. سوپاس بۆ خوا خووی هەمیشەییی زۆربەی ئێرانییەکان جگە لەمە نەبووە، و چاوەڕوان دەکرێت لەم ڕۆژە تایبەتانەدا، کە بێگومان بە هەندێک لە تاکەکانی گەل قورستر لە ئەوانی دیکە تێدەپەڕێت، ئەمە دەرکەوتنێکی زیاتری هەبێت. هەر لەم دەرفەتەدا داوا لە دەزگا خزمەتگوزارییەکان دەکەم کە لەم ڕووەوە لە هیچ جۆرە یارمەتی و هاوکارییەک بۆ ئەو تاکە خۆشەویستانەی گەل و بۆ پێکهاتە جەماوەرییە فریاکەوتنەکان دریغی نەکەن.

ئەگەر ئەم لایەنانە ڕەچاو بکرێن، ڕێگای گەیشتنی ئێوەی گەلی خۆشەویست بە ڕۆژانی مەزنی و شکۆ هەموار دەبێت. نزیکترین نموونەی ئەمەش دەتوانێت بە ئیزنی خوا سەرکەوتن بێت بەسەر دوژمندا لە جەنگی ئێستادا.

بەشی سێیەمی قسەکانم، سوپاسی دڵسۆزانەیە بۆ تێکۆشەرە ئازاکانمان، کە لە هەلومەرجێکدا کە گەل و نیشتمانی خۆشەویستمان بە شێوەیەکی ستەملێکراوانە کەوتووەتە بەر هێرشی سەرانی بەرەی ئیستیکبار، بە زەبرە کوشندەکانیان ڕێگای دوژمنیان گرتووە و لە خەیاڵی ئەگەری زاڵبوون بەسەر نیشتمانی خۆشەویست و بەڵکوو دابەشکردنیدا دەریان هێناون. برا تێکۆشەرە خۆشەویستەکان! ویستی جەماوەری خەڵک، درێژەدان بە بەرگرییەکی کاریگەر و پەشیمانکەرەوەیە. هەروەها بێگومان دەبێت هێشتا سوود لە کارتی داخستنی گەرووی هورمز وەربگیرێت. سەبارەت بە کردنەوەی بەرەی دیکە کە دوژمن ئەزموونێکی کەمی تێیدا هەیە و بە توندی تێیدا زیانپێگەیشتوو دەبێت، لێکۆڵینەوە کراوە، و چالاککردنی لە حاڵەتی بەردەوامبوونی دۆخی جەنگدا و بە پێی ڕەچاوکردنی بەرژەوەندییەکان ئەنجام دەدرێت.

هەروەها سوپاسی دڵسۆزانەم بۆ تێکۆشەرانی بەرەی بەرگری هەیە. ئێمە وڵاتانی بەرەی بەرگری بە باشترین دۆستی خۆمان دەزانین، و کاری بەرگری و بەرەی بەرگری بەشێکی جیانەکراوەیە لە بەهاکانی شۆڕشی ئیسلامی. بێگومان هاوڕێیەتیی بەشەکانی ئەم بەرەیە لەگەڵ یەکتردا، ڕێگای ڕزگاربوون لە فیتنەی زایۆنی کورتتر دەکاتەوە؛ هەروەک بینیمان یەمەنی ئازا و باوەڕدار دەستی لە بەرگری لە خەڵکی ستەملێکراوی غەززە هەڵنەگرت، و حیزبوڵڵای فیداکار سەرەڕای هەموو ڕێگرییەکان بە هانای کۆماری ئیسلامییەوە هاتووە، و بەرگریی عێراقیش بە ئازایەتی هەمان ڕێبازی گرتووەتە بەر.

لە بەشی چوارەمدا، ڕووی قسەم لەو کەسانەیە کە لەم چەند ڕۆژەدا بە جۆرێک زیانیان پێ گەیشتووە؛ چ ئەوانەی داغی شەهیدبوونی خۆشەویستێک یان چەند خۆشەویستێکیان ئەزموون کردبێت، چ ئەوانەی کە بریندار بووبن، و چ ئەوانەی کە زیان بە ماڵ و حاڵ یان شوێنی کار و کاسبییان گەیشتبێت. لەم بەشەدا یەکەم، هاودەردیی قووڵی خۆم لەگەڵ ماوەکانی شەهیدانی پایەبەرز ڕادەگەیەنم. ئەمە لەسەر بنەمای ئەزموونێکی هاوبەشە کە من لەگەڵ ئەم بەڕێزانەدا هەمە؛ جگە لە باوکم کە داغی لەدەستدانی ئەو بووەتە کارێکی گشتی، هاوسەری خۆشەویست و وەفادارم کە هیوای زۆرم پێی بوو، و خوشکە فیداکارەکەم کە خۆی تەرخانی خزمەتی دایک و باوکی کردبوو و سەرئەنجام پاداشتی خۆی وەرگرت، و هەروەها منداڵە بچووکەکەی، و مێردی خوشکێکی دیکەم کە مرۆڤێکی زانا و بەڕێز بوو، سپاردووەتە کاروانی شەهیدان. بەڵام ئەوەی ئارامگرتن لەسەر کارەساتەکان دەلوێنێت و تەنانەت ئاسانی دەکات، سەرنجدانە بە بەڵێنی بێگومان و یەکجاریی خوایی بۆ پاداشتێکی بەنرخ بۆ ئارامگران. بۆیە دەبێت ئارام بگیرێت و هیوا و متمانە بە میهرەبانی و دەستگیریی خوای پەروەردگار (جلّ و علا) هەبێت.

دووەم: ئەم دڵنیاییە بە هەمووان دەدەم کە ئێمە لە تۆڵەسەندنەوەی خوێنی شەهیدەکانتان چاوپۆشی ناکەین. ئەو تۆڵەیەی لە بەرچاومانە، تەنیا پەیوەست بە شەهیدبوونی ڕێبەری پایەبەرزی شۆڕشەوە نییە؛ بەڵکوو هەر ئەندامێکی گەل کە لە لایەن دوژمنەوە شەهید دەکرێت، خۆی بابەتێکی سەربەخۆیە بۆ دۆسیەی تۆڵەسەندنەوە. بێگومان بڕێکی سنووردار لەم تۆڵەیە تا ئێستا شێوەی بەرجەستەی وەرگرتووە، بەڵام هەتا بە تەواوی بەدەست نەیەت، ئەم دۆسیەیە هەر لە سەرووی دۆسیەکانی دیکەوە دەمێنێت، و بە تایبەتی سەبارەت بە خوێنی منداڵ و کۆرپەکانمان هەستیاریی زیاترمان دەبێت. بۆیە ئەو تاوانەی کە دوژمن بە ئەنقەست سەبارەت بە قوتابخانەی «شەجەرەی تەییبە»ی میناب و هەندێک حاڵەتی هاوشێوە ئەنجامی داوە، پێگەیەکی تایبەتی لەم بەدواداچوونەدا هەیە.

سێیەم: بێگومان دەبێت جانبازانی (برینداران و پەککەوتەکانی) ئەم هێرشانە خزمەتگوزاریی چارەسەریی گونجاو بە خۆڕایی وەربگرن و لە هەندێک ئیمتیازی دیکەش سوودمەند بن.

چوارەم: تا ئەو جێگایەی دۆخی ئێستا ڕێگە بدات، دەبێت بۆ قەرەبووکردنەوەی زیانە داراییەکانی گەیشتوو بە شوێن و ماڵ و موڵکی کەسی، ڕێوشوێنی پێویست دیاری بکرێت و جێبەجێ بکرێت. ئەم دوو خاڵەی دوایی وەک ئەرکێکی پێویستی جێبەجێکردنن بۆ بەرپرسانی بەڕێز، کە دەبێت جێبەجێی بکەن و ڕاپۆرتەکەی بە من بدەن.

خاڵێک کە دەبێت بیخەمەوە بیر، ئەوەیە کە بە هەر شێوەیەک بێت، ئێمە قەرەبوو لە دوژمن وەردەگرین، و ئەگەر ڕەتی بکاتەوە، بە ئەو ئەندازەیەی کە دیاری دەکەین لە ماڵ و سامانەکەی هەڵدەگرین، و ئەگەر ئەوەش نەلوێت، بە هەمان ئەندازە لە ماڵ و سامانەکەی لەناو دەبەین.

بەشی پێنجەمی قسەکانم، ئاراستەی سەران و ئاستە کاریگەرەکانی هەندێک لە وڵاتانی ناوچەیە. ئێمە لەگەڵ پازدە وڵاتدا دراوسێیەتیی وشکانی یان ئاویمان هەیە، و هەمیشە ئارەزوومەندی پەیوەندیی گەرم و بنیاتنەر لەگەڵ هەموویاندا بووین و هەین، بەڵام دوژمن لە چەندین ساڵ لەمەوبەرەوە وردە وردە بنکەی سەربازی و دارایی لە هەندێک لەم وڵاتانەدا دامەزراندووە تاکوو زاڵبوونی خۆی بەسەر ناوچەکەدا دابین بکات. لە هێرشی دواییدا، هەندێک لە بنکە سەربازییەکان بەکار هێنران، کە بێگومان ئێمە هەروەک ئاگادارکردنەوەی ڕوونمان دابوو و بەبێ ئەوەی دەستدرێژی بکەینە سەر ئەو وڵاتانە، تەنیا هێرشمان کردە سەر هەمان بنکەکان. لەمەودوا ناچار دیسان درێژە بەم کارە دەدەین؛ هەرچەندە هێشتا باوەڕمان بە پێویستیی دۆستایەتی لە نێوان خۆمان و ئەو دراوسێیانەماندا هەیە. ئەم وڵاتانە دەبێت هەڵوێستی خۆیان لەگەڵ دەستدرێژکارانی سەر نیشتمانی خۆشەویستمان و بکوژانی تاکەکانی گەلەکەمان ڕوون بکەنەوە. من ڕاسپاردە دەکەم هەرچی زووتر ئەو بنکانە دابخەن؛ چونکە بێگومان تا ئێستا تێگەیشتوون کە بانگەشەی دامەزراندنی ئاسایش و ئاشتی لە لایەن ئەمریکاوە جگە لە درۆیەک هیچی دیکە نەبووە. ئەمە دەبێتە هۆی ئەوەی کە لەگەڵ گەلەکانی خۆیاندا، کە بە گشتی لە هاوڕێیەتی لەگەڵ بەرەی کوفر و هەڵسوکەوتە سووکایەتیئامێزەکەی ناڕازین، پەیوەندیی زیاتریان هەبێت و سامان و هێزیان زیاد بێت. دیسان دووپاتی دەکەمەوە: سیستەمی کۆماری ئیسلامی، بەبێ ئەوەی بیەوێت هیچ دەسەڵاتخوازی و داگیرکارییەک لە ناوچەکەدا بخاتە ڕێ، ئامادەییی تەواوی هەیە بۆ یەکگرتن و پەیوەندیی دوولایەنەی گەرم و دڵسۆزانە لەگەڵ هەموو دراوسێکاندا.

لە بەشی شەشەمی قسەکانمدا، ڕووی قسەم لە ڕێبەری شەهیدمانە. ئەی ڕێبەر! بە ڕۆیشتنت داغێکی قورست خستە سەر دڵی هەمووان. تۆ هەمیشە تامەزرۆی ئەم سەرئەنجامە بوویت، تاکوو سەرئەنجام خوای پەروەردگار لە کاتی خوێندنەوەی قورئانی پیرۆزدا، لە بەرەبەیانی ڕۆژی دەیەمی ڕەمەزانی پیرۆزدا پێی بەخشیت. چەندین ستەملێکراوییت بە دەسەڵاتەوە و بە لەسەرخۆییەوە بەرگە گرت و برۆت گرژ نەکرد. زۆر کەس نرخی ڕاستەقینەی تۆیان نەناسی، و لەوانەیە ماوەیەکی درێژ تێپەڕێت تا جۆرەها پەردە و ڕێگری لا بچن و گۆشەگەلێک لەوە ئاشکرا بێت. هیوادارین لە ڕێگەی ئەو پلەی نزیکییەوە کە لە دراوسێیەتیی نوورە پاکەکان و ڕاستگۆیان و شەهیدان و ئەولیادا بۆت ئامادە کراوە، دیسان بیر لە پێشکەوتنی ئەم گەلە و هەموو گەلانی بەرەی بەرگری بکەیتەوە و تکای بۆ بکەیت؛ هەروەک لە ژیانی دونیاییی خۆتدا وا بوویت. ئێمە پەیمانت لەگەڵ دەبەستین کە بۆ بەرزکردنەوەی ئەم ئاڵایە، کە ئاڵای سەرەکیی بەرەی حەقە، و بۆ گەیشتن بە ئامانجە پیرۆزەکانی بەڕێزت، بە هەموو بوونمانەوە هەوڵ بدەین.

لە بەشی حەوتەمدا سوپاسی هەموو ئەو بەڕێزانە دەکەم کە پشتگیرییان لێ کردووم، لەوانە مەرجەعە گەورەکانی تەقلید و کەسایەتییە جیاوازە کولتووری، سیاسی و کۆمەڵایەتییەکان، و تاکەکانی گەل کە لە کۆبوونەوە پڕشکۆکاندا بۆ دەربڕینی بەیعەتی نوێ لەگەڵ سیستەمدا ئامادە بوون، و هەروەها بەرپرسانی هەر سێ دەسەڵات و ئەنجومەنی کاتیی ڕێبەری بەهۆی تەدبیر و ڕێوشوێنە باشەکانیانەوە.

هیوادارم میهرەبانییە تایبەتە خوداییەکان لەم کاتژمێر و ڕۆژە پڕ فەیزانەدا هەموو گەلی ئێران، بەڵکوو هەموو موسڵمانان و چەوسێنراوانی جیهان بگرێتەوە.

و لە کۆتاییدا لە گەورەکەمان (خوای گەورە لە دەرکەوتنی پیرۆزی پەلە بکات) داوا دەکەم کە لەم ماوە ماوەیەی شەوان و ڕۆژانی قەدر و مانگی پیرۆزی ڕەمەزاندا، لە بارەگای خوای پەروەردگار (جلّ و علا) بۆ گەلەکەمان سەرکەوتنی یەکلاکەرەوە بەسەر دوژمندا و هەروەها سەربەرزی و فراوانی و تەندروستی، و بۆ کۆچکردووەکانیان پلە و پایە و تەندروستیی ئاخیرەت داوا بکات.

والسّلام علیکم و رحمة‌اللّه و برکاته و تحیّاته
سڵاو و ڕەحمەت و بەرەکەت و درودەکانی خواتان لەسەر بێت.

سەید موجتەبا حوسەینی خامنەیی
٢١ی ڕەشەمەی ١٤٠٤ بەرامبەر بە ٢٢ی ڕەمەزانی پیرۆزی ١٤٤٧

(1) سوورەتی بەقەرە، بەشێک لە ئایەتی ١٠٦