Qurolli kuchlar yuqori qo‘mondonlarining Oliy Bosh qo‘mondon bilan uchrashuvi

Bu forscha asl matnning tarjimasi. Forscha asl matn

Qurolli kuchlarning yuqori martabali qo‘mondonlari muhtaram Oliy Bosh qo‘mondon Hazrat Oyatulloh Sayyid Mujtabo Xomanaiy bilan uchrashdilar.

Inqilob Rahbari ushbu uchrashuvda «dushmanlarga qudratli qarshilik ko‘rsatish uchun oqilona jangovar tayyorgarlik»ni «maksimal darajada to‘xtatib turish»ning zaruriy shartlaridan biri deb bildilar va har qanday darajadagi va turdagi tahdidga zudlik bilan, ta’sirchan va geografik cheklovlarsiz javob berilishi lozimligini belgiladilar.

Hazrat Oyatulloh Sayyid Mujtabo Xomanaiy ta’kidladilar: agar dushmanlar yana harbiy yoki terroristik hujumlarni boshlasa, uning tugash vaqti va shartlarini aynan Islom Respublikasining Qurolli kuchlari va Eron millati belgilaydi.

Oliy Bosh qo‘mondon, shuningdek, harbiy razvedka arxitekturasini mustahkamlash, «doktrina» va «taktika» kabi ikki sohada milliy mudofaani chuqurlashtirish, yangi texnologiyalardan foydalangan holda zamonaviy mudofaa va xavfsizlik salohiyatini oshirish, ma’naviy qudrat va jihodiy ruhni kuchaytirishni — Qurolli kuchlarning maishiy ehtiyojlarini ta’minlash va ularni qo‘llab-quvvatlash borasidagi tinimsiz sa’y-harakatlar bilan bir vaqtda — ta’kidladilar.

Oliy Bosh qo‘mondon ko‘rsatmalarining yana bir qismida nishonlar bankini amerika-sionist dushmanning turli moddiy va nomoddiy aktivlari Qurolli kuchlarning zarba yetkazish masofasida bo‘ladigan tarzda yangilash belgilandi.

U zot Qurolli kuchlarni milliy qo‘llab-quvvatlashni Eronga dushman bo‘lgan begonalar va ularning ichki yollanmalariga qarshi to‘xtatib turishning ustunlaridan biri deb bildilar va qo‘shimcha qildilar: qo‘zg‘algan millatning sakkiz oy davomida maydonlarda hozir bo‘lishi sakkiz yillik Muqaddas mudofaaning davomi bo‘lib, u harbiy, huquqni muhofaza qilish va Basij kuchlarining matonati bilan birga Eronning hududiy yaxlitligi va Islom tuzumini himoya qilib keldi va bundan keyin ham himoya qiladi.

Islom inqilobining muazzam Rahbari turli mamlakatlardagi Qarshilik frontining oqilona sobitqadamligini qadrlab, maydonlar birligini G‘arbiy Osiyoda yangi siyosiy va xavfsizlik tartibini shakllantirishda strategik ta’sirga ega hal qiluvchi omil deb bildilar va bu yangi tartib Islom millatlari va davlatlarining yangi islom sivilizatsiyasini shakllantirish yo‘lidagi birligi uchun tobora kengroq zamin yaratishiga umid bildirdilar.

Qurolli kuchlar Bosh shtabi boshlig‘i Sepoh general-mayori Abdullohiy, Armiya Bosh qo‘mondoni Armiya general-mayori Hotamiy va Islom inqilobi qo‘riqchilari korpusi Bosh qo‘mondoni Sepoh general-mayori Vahidiy Oliy Bosh qo‘mondon bilan uchrashuvda mamlakat himoyachilarining Fors ko‘rfazi sohillarida, Hormuz bo‘g‘ozi va Ummon dengizining operatsion hududlarida hamda mamlakatning shimoli-g‘arbiy va janubi-sharqiy chegaralaridagi tayyorgarlik holati haqida hisobotlar taqdim etish bilan birga, turli o‘q-dorilar hamda razvedka, yordamchi va jangovar qurollar ishlab chiqarishning bir necha baravar oshgani haqida ham u zotga ma’lum qildilar.

Oliy Bosh qo‘mondon amalga oshirilgan ishlardan mamnunligini izhor qilib, yuqori harbiy qo‘mondonlardan o‘zining minnatdorligi va roziligini barcha harbiy, huquqni muhofaza qilish va Basij kuchlariga, ushbu tashkilotlar va Mudofaa vazirligi xodimlariga hamda ularning aziz oilalariga yetkazishlarini so‘radilar.