Peyam ji bo Kongreya Giştî ya Nimêjê ya sî û sêyemîn

Ev wergera metna esil a farisî ye. Metna esil bi farisî

بسم‌الله‌الرّحمن‌الرّحیم
Bi navê Xwedayê Rehman û Rehîm

Balkişandina li ser karê bilind ê «bicihanîna nimêjê» û bi taybetî lidarxistina kongreya nimêjê, ji karên pêwîst û layiq e ku ji destpêka salên heftêyî ve li welêt bi xîreta alimê mucahid û gelêrî, mamosteyê Qur'anê û mubellixê jêhatî Huccetulîslam wel-Muslimîn Qeraetî (Xwedê bereketên wî bidomîne) pêk hatiye. Xîreta taybet a Rêberê payebilind ê şehîd (Xwedê payeya wî ya bilind bilindtir bike) li ser vê mijarê û şîretên wî yên girîng, domdar û tekezkirî di peyamên têkildarî sî û du kongreyên borî de jî girîngiya vê rêbazê zêde dikin. Bê guman axaftin an nivîsandina li ser nimêjê li gorî paye û asta wehya Xwedayî û gotinên Pêxemberê Ekrem (silav û selewata Xwedê li ser wî û malbata wî be) û Îmamên Masûm (silav û selewat li ser wan be) ye, û pênûsa kesên wekî min ji wê piçûktir e ku li ser kûrahiya zanînên nimêjê tiştekî binivîse. Lê nasname û pêwîstiyên civaka Îslamî û erkên xizmetkarên wê, bi taybetî rêberiya Şoreşa Îslamî, wisa pêwîst dikin ku ez di vê derbarê de çend hevokan ji xwe, ji hemû gel û berpirsan re bi bîr bînim.

Nimêj ji xweşiktirîn nîmetên mezin ên Xwedayê Heq (Mezin û Bilind be), bilindtirîn sazî, sembol û stûna dîn e; ew têla girêdana her yek ji me ye ji bo têkiliya nêzîk û rasterast bi çavkaniya bêdawî û nemir a Xwedayî re. Ev îksîra felah û rizgariyê û stûna jiyana pak (heyata teyyîbe), hem piştgirê xurt û domdar û xezîneya neqedandî ya mirovan e di tekoşîna li dijî şeytanê nefsê û şeytanên dinyayî de, û hem jî kaniya kelê ya evîn, hêvî, dilovanî û aramiyê ye; û daketina bereketan û zêdebûna rizqên Xwedayî ji aliyê bicihanîna nimêj û îstixfarê ve pêk tê û zêde dibe.

Lê ferza nimêjê ne tenê erkeke takekesî ye, û li gorî hînkirina Qur'anê, bicihanîna nimêjê yekemîn ber û nîşana desthilatdariya salihan e: «اَلّذینَ اِنْ مَکَّنّاهُم فی الأرضِ اَقاموا الصَّلاة» (Ew in ên ku eger Em wan li ser rûyê erdê bi cih bikin, nimêjê bi cih tînin) (Qur'an, Hec 22:41). Hatina vê ayetê rast piştî ayeta soza alîkariya Xwedê derbarê alîkarên Xwedayê Bilind û cîhada wan di sûreya pîroz a Hecê de nîşan dide ku bicihanîna nimêjê, wekî piştgirê xurt ê zikra Xwedê û hêvî û baweriya bi Wî, di cîhad, fetih û serkeftina li qadên tekoşînê de, bi taybetî li wê qada tekoşînê ya ku îro li pêşiya miletê Îranê ye, roleke taybet heye.

Îro ku şerta desthilatdarî û hêza gelê delal ê Îranê ji berê bêtir pêk hatiye, her yek ji miletê rabûyî muxatabê vê fermana Xwedayî ya dubarekirî ya ji bo bicihanîna nimêjê ye: «اَقیموا الصَّلاة» (Nimêjê bi cih bînin). Ji bilî vê, hemû kesên bibandor ên civakê, ji dê û bav û malbatan heta mamoste û hevalan, ji profesor û elîtan heta rûyên naskirî û kesên navdar, û herwiha hemû sazî û dezgehên çandsaz, di nav de mizgeft, nimêjên înê, dibistan, zanîngeh, medreseyên olî, Radyo û Televizyon, çalakvanên çandî û civakî û Besîca gelêrî, bi taybetî yên ku bi zarok û ciwanan re têkiliya wan heye, di vê mijarê de xwediyê berpirsiyariyeke ducarî ne.

Bicihanîna nimêjê, di hemû qonaxên temamker û astên pêşketina wê de, li seranserê civak û welatekî ku ala Îslama safî ya Muhemmedî (silav û selewata Xwedê li ser wî û malbata wî be) bilind kiriye û bi desthilatdariya Îslamê şanaz bûye, ji girîngtirîn karan e; û ji bo amadekirina zemîna derbasbûna ji qonaxa tevger û Şoreşa Îslamî heta qonaxa civaka Îslamî tiştekî pêwîst e, û piştî wê ye ku gihîştina qonaxa şaristaniya Îslamî dê mimkun bibe. Sazîbûn, belavbûn û giştîbûna nimêjê û piştre hewldana giştî ji bo bi awayekî baş bicihanîna wê, du aliyên sereke yên xeta hewldanê ne ji bo gihîştina vê armanca girîng; û avakirina mizgeftan û amadekariyên din ji bo berfirehkirina hejmar û bilindkirina kalîteya xuya ya nimêjên cemaet û înê, pêşmercên pêwîst in ji bo gihîştina vê armanca girîng. Di hemû van warên de rola pêşnimêjên cemaet û înê, ku divê penageha gel û guhê guhdar û qebûlker ê derdê dilê wan bin, pir berçav e.

Ez hêvî dikim ku bi keremên Xwedê û bi bal û duaya taybet a Serwerê me (Xwedê zû fereca wî bîne), miletê me û welatê me yê delal di karê bicihanîna nimêjê û sûdwergirtina ji feyz û bereketên wê de serkeftî û piştgirtî bin.

Seyid Mucteba Huseynî Xamineyî
9/Mihr/1405