Ujumbe kuhusu Tukio Kubwa la Kishujaa la Kumuaga Bwana…

Hii ni tafsiri ya matini asilia ya Kiajemi. Matini asilia kwa Kiajemi

بسم‌الله الرّحمن الرّحیم
Kwa jina la Mwenyezi Mungu, Mwingi wa Rehema, Mwenye Kurehemu.

Ewe taifa tukufu na lenye kustaajabisha la Iran!

Salamu, heshima na shukrani ziwe juu yenu ambao, kwa tukio lenu la kishujaa lisilo na mfano na la kihistoria katika mwamko usio na kifani wa kumuaga Bwana shahidi wa Iran, mmethibitisha kiwango kipya cha udhihirisho wa mwamko na azma imara ya utambulisho wa Kiislamu na Kiirani katika kuthamini, uaminifu, ufahamu na kuonyesha mapenzi ya kipekee kwa kiongozi wa Umma wa Kiislamu na Kiongozi shahidi wa Mapinduzi. Joto la nyoyo zilizowaka, macho yaliyojaa machozi na azma thabiti za umati wa makumi ya mamilioni uliotanda kwa makumi ya kilomita huko Tehran, Qom, Mashhad na miji na vijiji vingine, viliwafanya marafiki wa taifa la Iran na watu huru wa dunia kusifu, na maadui wa kibeberu wa taifa la Iran kuingia katika mshangao, kuchanganyikiwa, hasira na hofu.

Sambamba na tukio hili la kishujaa, uvunjaji wa ahadi wa mara kwa mara wa Shetani Mkubwa kuhusu hati ya maelewano iliyosainiwa kati ya Marais wa Iran na Marekani, kwa mara nyingine uliwathibitishia wote ukweli kwamba saini ya Rais wa Marekani haina thamani wala uhalali kiasi gani, na kwamba ubabe, tamaa ya kutawala kila kitu na ukatili ni sehemu zisizotenganishika za mwenendo na mtazamo wa Kimarekani. Leo Shetani Mkubwa kwa mara nyingine amedhihirisha sura yake halisi bila barakoa, ili uzoefu huu wa giza wa jinai na kuvunja ahadi uwe hati nyingine imara ya uongo, kutokuwa na mantiki, kutoaminika na uovu wa Marekani. Sasa ambapo adui wa Kimarekani anatafuta kuwasha vita na kubeba gharama nzito zaidi na fedheha kubwa zaidi, ajue kwamba taifa adhimu la Iran na kambi ya Muqawama vina mafunzo yasiyosahaulika kwa ajili yake, ambayo ushujaa wa wapiganaji wa Uislamu na ghera ya watu mashujaa wa eneo la kusini katika siku hizi umeonyesha mifano yake.

Ni lazima kuwaambia ninyi wananchi waaminifu na wenye fahari wa Iran kwamba miongoni mwa mambo ya msingi kabisa katika kipindi hiki ni kusisitiza umoja wa kauli na mshikamano mtakatifu katika ngazi zote za wananchi na viongozi na katika nyanja zote, kwa ajili ya kutimiza malengo ya juu ya Mapinduzi ya Kiislamu na kudhamini heshima na uhuru wa Iran mpendwa, hasa mbele ya adui wa Kimarekani mhalifu na mwenye hila. Kama ilivyokumbushwa hapo awali mara kwa mara na kwa msisitizo, kulinda umoja na kujiepusha na mfarakano na mizozo, tofauti za kisiasa na kuangazia tofauti za kijamii ni jukumu la wote, na bila shaka nafasi ya viongozi na wahusika wenye kujali na waliojitolea kwa Mapinduzi, kwa Imam na kwa Kiongozi shahidi katika mshikamano na umoja wa nchi ni muhimu zaidi na nyeti zaidi.

Kwa msingi huu, taifa adhimu, kwa kuendelea kuwaamini viongozi wenye kujali katika mihimili yote mitatu, ambao juhudi zao kwa ajili ya ustawi na saada ya taifa zinaonekana wazi, litaendelea kuwa macho na hai uwanjani ili kudhamini ulinzi wa maslahi ya Iran ya Kiislamu. Huenda baadhi ya watu, kwa ikhlasi kamili na kwa nia njema, wakawa na ukosoaji kuhusu utendaji wa baadhi ya viongozi. Kwa mtazamo wangu, ingawa hima na wasiwasi wao huu kwa ajili ya mfumo, kama walivyo wao wenyewe, unahesabiwa kuwa rasilimali yenye thamani na lenyewe ni jambo linalotakiwa, wapendwa hawa, ambao baadhi yao ni miongoni mwa watangulizi wa ufahamu, wanapaswa kuwa makini ili mwelekeo huu, kwanza, usimdhulumu asiye na hatia, jambo ambalo lenyewe ni chanzo cha kunyimwa baraka na fadhila; na pili, usisababishe kuvunjika kwa umoja na mshikamano wa kijamii; kwa kuzingatia mambo haya, ukosoaji utaleta ustawi na kuchanua kwa mambo. Adui hapaswi kupokea kutoka kwetu ishara yoyote ya udhaifu, ukiwemo udhaifu huu; kwa kuwa iwapo tutazingatia tahadhari hizi kikamilifu, yeye kwa ulazima atakimbia.

Kwa mara nyingine natoa shukrani za dhati kwa kila mmoja wa wananchi wapendwa ambao wao wenyewe ndio wafiwa wa baba shahidi wa Umma, na ambao, licha ya ugumu, baadhi ya vikwazo na matatizo, wameunda tukio la kishujaa la kihistoria katika tukio kubwa la kumuaga Bwana shahidi wa Iran.

Vilevile nawashukuru Marajii watukufu wa Taqlid, maulamaa, wanafikra na wasomi, wanaharakati wa kiutamaduni, kijamii na kisiasa, na hatua na juhudi za taasisi za kiraia na za kijeshi, pamoja na kuhudhuria kwa viongozi na wawakilishi wa kambi tukufu ya Muqawama na harakati za Kiislamu zenye fahari. Inatarajiwa kwamba wote waliohudhuria, kushiriki na kuonyesha huruma kwa namna yoyote katika tukio hili la kishujaa la kihistoria wataenezewa fadhila na dua maalumu ya Bwana wetu (Mwenyezi Mungu aharakishe faraja yake tukufu).

Sayyid Mojtaba Hosseini Khamenei
26/Tir/1405