Inqilob Rahbari Oyatulloh Sayyid Mujtabo Xomanaiyning…

Bu forscha asl matnning tarjimasi. Forscha asl matn

بسم الله الرّحمن الرّحیم
Mehribon va rahmli Alloh nomi bilan

مَا نَنسَخ مِن آیَةٍ اَو نُنسِها نَأتِ بِخَیرٍ مِنها اَو مِثلِها. (1)
«Biror oyatni bekor qilsak yoki unuttirsak, undan yaxshirog'ini yoki unga o'xshashini keltiramiz.» (Qur'oni karim, Baqara surasi, 2:106)

اَلسَّلامُ‌عَلَیكَ یا داعِیَ اللّهِ وَ رَبّانِیَّ آیاتِهِ اَلسَّلامُ عَلَیكَ یا بابَ اللّهِ وَ دَیّانَ دینِهِ اَلسَّلامُ عَلَیكَ یا خَلیفَةَ اللّهِ و ناصِرَ حَقِّهِ اَلسَّلامُ عَلیكَ یا حُجَّةَ ا‌للّهِ وَ دَلیلَ اِرادَتِه اَلسَّلامُ عَلَیكَ اَیُّهَا المُقَدَّمُ المَأمول اَلسَّلامُ عَلَیكَ بِجَوامِعِ السَّلام. اَلسَّلامُ‌عَلَیكَ یا مَولایَ صاحِبَ الزَّمان.
Senga salom bo'lsin, ey Allohga da'vat qiluvchi va Uning oyatlarining rabboniy bilimdoni! Senga salom bo'lsin, ey Allohning eshigi va Uning dinining hokimi! Senga salom bo'lsin, ey Allohning xalifasi va Uning haqqining yordamchisi! Senga salom bo'lsin, ey Allohning hujjati va Uning irodasining dalili! Senga salom bo'lsin, ey oldinga qo'yilgan va umid bog'langan zot! Senga salomning barcha jamlanmasi bilan salom bo'lsin. Senga salom bo'lsin, ey mavlom, Sohibuz-Zamon!

So'zim boshida Sarvarimga (Alloh taolo u zotning farajini tezlashtirsin) Inqilobning ulug' martabali Rahbari, aziz va hakim Xomanaiyning jonni kuydiruvchi shahodati munosabati bilan ta'ziya bildirishim va u zotdan ulug' Eron millatining har bir a'zosi, balki butun dunyo musulmonlari, Islom va Inqilobning barcha xizmatkorlari, fidoyilar, Islomiy harakat va ayniqsa so'nggi urush shahidlarining yaqinlari hamda ushbu ojiz bandaning o'zi uchun xayrli duo qilishlarini so'rashim lozim.

So'zimning ikkinchi qismi ulug' Eron millatiga qaratilgan. Avvalo, muhtaram Ekspertlar Majlisining ovozi borasidagi o'z holatim va mavqeimni qisqacha bayon qilishim kerak. Sizlarning ushbu xizmatkoringiz Sayyid Mujtabo Husayniy Xomanaiy muhtaram Ekspertlar Majlisi ovozining natijasidan sizlar bilan bir vaqtda, Islom Respublikasi televideniyesi orqali xabardor bo'ldim. Men uchun ikki ulug' martabali peshvo – buyuk Xumayniy va shahid Xomanaiy o'tirgan joyga o'tirish og'ir ishdir; chunki bu kursida shunday bir zot o'tirganki, u Alloh yo'lida oltmish yildan ortiq mujohada qilib, turli lazzat va rohatlardan voz kechib, nafaqat hozirgi asrda, balki bu mamlakat hukmdorlari tarixi davomida porloq gavhar va mumtoz siymoga aylangan. Uning hayoti ham, vafot etish tarzi ham Haqqa tayanishdan kelib chiqqan shukuh va izzat bilan qorishgan edi.

Menga u zotning jasadini shahodatidan so'ng ziyorat qilish muvaffaqiyati nasib etdi; ko'rganim bir tog' mustahkamlik edi; eshitdimki, sog' qolgan qo'lining mushtini tugib olgan ekan. U zot shaxsiyatining turli qirralari haqida xabardor kishilar uzoq vaqt ko'p narsalarni aytishlari kerak bo'ladi. Ushbu fursatda shu qisqa so'z bilan kifoyalanib, tafsilotlarni boshqa munosib vaziyatlarga qoldiraman. Bunday zotdan so'ng rahbarlik kursisiga o'tirishning og'irligi sababi ana shudir. Bu bo'shliqni to'ldirish faqat Haq taolodan madad so'rash va sizlar, xalqning yordami bilan mumkin.

Davomida so'zimning asl mohiyatiga bevosita aloqador bir nuqtani ta'kidlab o'tishim lozim. U nuqta shuki, shahid Rahbar va u zotning buyuk salafining mahoratlaridan biri xalqni barcha sohalarga jalb etish, ularga muttasil basirat va ogohlik berish va amalda ularning kuchiga tayanish edi. Ular shu tariqa jumhur va jumhuriyatning haqiqiy ma'nosini amalga oshirdilar va unga jon-dildan e'tiqod qilardilar. Buning yaqqol ta'siri mamlakat rahbarsiz va Qurolli Kuchlar Oliy Bosh qo'mondonisiz qolgan shu bir necha kunda ko'rindi. Ulug' Eron millatining so'nggi voqeadagi basirati va zakovati, sabot-matonati, shijoati va maydonda hozir bo'lishi do'stni hayratga, dushmanni esa dahshatga soldi. Mamlakatni boshqargan va uning qudratini kafolatlagan aynan sizlar, xalq edingiz.

Ushbu yozuvning boshida keltirgan oyatim shu ma'noni anglatadiki, ilohiy oyatlardan hech bir oyat yo'qki, uning muddati tugasa yoki unutilsa, Haq taolo (jalla va alo) tomonidan uning o'rniga unga o'xshashi yoki undan ustunrog'i berilmasa. Bu sharafli oyatdan foydalanishning sababi ushbu bandaning shahid Rahbar darajasida ekanligi emas, u zotdan ustun deb hisoblanishni istashim haqida esa gap ham bo'lishi mumkin emas; balki muborak oyatni zikr qilishdan maqsad sizlar, aziz millatning o'rinli va yorqin roliga e'tibor qaratishdir. Agar o'sha ulug' ne'mat bizdan olingan bo'lsa, uning o'rniga yana bir bor Eron millatining Ammordek ishtiroki ushbu tuzumga ato etildi. Shuni bilingki, agar sizlarning qudratingiz maydonda zohir bo'lmasa, na rahbarlik, na asl vazifasi xalqqa xizmat qilish bo'lgan turli idoralarning hech biri zarur samaradorlikka ega bo'lmaydi.

Bu ma'no yaxshiroq ro'yobga chiqishi uchun, birinchidan, Alloh tabaraka va taoloni yod etish, U Zotga tavakkul qilish va ma'sumlarning (Allohning salavotlari barchalariga bo'lsin) pok nurlariga tavassul qilishga turli kushoyishlar va dushman ustidan qat'iy g'alabani kafolatlovchi buyuk iksir va kibriti ahmar sifatida qaralishi kerak. Bu shunday ulug' afzallikki, sizlar unga egasiz, dushmanlaringiz esa undan mahrum.

Ikkinchidan, odatda tang vaziyatlarda alohida namoyon bo'ladigan millat a'zolari va qatlamlari o'rtasidagi birlikka putur yetmasligi kerak. Bunga ixtilofli nuqtalardan ko'z yumish orqali erishiladi.

Uchinchidan, maydonda samarali ishtirok saqlanib qolishi kerak – xoh urushning shu kunlari va tunlarida o'zingizdan namoyon etganingiz kabi shaklda bo'lsin, xoh ijtimoiy, siyosiy, tarbiyaviy, madaniy va hatto xavfsizlik sohalaridagi turli samarali ishtiroklar shaklida bo'lsin. Muhimi shuki, to'g'ri rol ijtimoiy birlikka putur yetkazmagan holda yaxshi anglanishi va imkon qadar amalga oshirilishi kerak. Rahbarlik va ayrim boshqa mas'ullarning vazifalaridan biri jamiyat a'zolari yoki qatlamlariga ushbu rollarning ba'zilarini eslatib turishdir. Shu sababli 1447-yil Quds kuni marosimlarida ishtirok etishning ahamiyatini eslataman; unda dushmanni sindirish unsuri hammaning diqqat markazida bo'lishi kerak.

To'rtinchidan, bir-biringizga ko'mak va yordam berishdan tiyilmang. Alhamdulillah, aksariyat eronliklarning doimiy xislati shunday bo'lib kelgan va tabiiyki, millatning ayrim a'zolari uchun boshqalarga qaraganda og'irroq kechayotgan shu alohida kunlarda bu narsa yanada yorqinroq namoyon bo'lishi kutiladi. Shu o'rinda xizmat ko'rsatuvchi idoralardan millatning o'sha aziz a'zolariga va xalq yordam tuzilmalariga har qanday ko'mak va yordamni ayamasliklarini so'rayman.

Agar bu jihatlarga rioya qilinsa, sizlar, aziz millatning ulug'vorlik va shukuh kunlariga yetishish yo'li ravon bo'ladi. Uning eng yaqin namunasi, Allohning izni bilan, hozirgi urushda dushman ustidan g'alaba bo'lishi mumkin.

So'zimning uchinchi qismi jasur jangchilarimizga samimiy minnatdorchilikdir. Millatimiz va aziz Vatanimiz istikbor jabhasi boshliqlarining mazlumona hujumiga uchragan bir sharoitda ular o'zlarining zarbdor zarbalari bilan dushman yo'lini to'sdilar va ularni aziz Vatanni egallash va ehtimol uni parchalash mumkinligi haqidagi xom xayoldan chiqardilar. Aziz jangchi birodarlar! Xalq ommasining xohishi samarali va dushmanni pushaymon qiluvchi mudofaaning davom etishidir. Shuningdek, Hurmuz bo'g'ozini to'sish dastagidan albatta foydalanishda davom etish kerak. Dushman kam tajribaga ega bo'lgan va unda o'ta zaif bo'ladigan boshqa jabhalarni ochish borasida tadqiqotlar o'tkazilgan; urush holati davom etsa va maslahatlarga rioya qilingan holda ularni faollashtirish amalga oshiriladi.

Shuningdek, Qarshilik jabhasi jangchilariga ham samimiy minnatdorchilik bildiraman. Biz Qarshilik jabhasi mamlakatlarini o'zimizning eng yaxshi do'stlarimiz deb bilamiz, qarshilik ishi va Qarshilik jabhasi Islom Inqilobi qadriyatlarining ajralmas qismidir. Shubhasiz, ushbu jabha qismlarining bir-biri bilan hamkorligi sionistik fitnadan qutulish yo'lini qisqartiradi; ko'rganimizdek, jasur va mo'min Yaman mazlum G'azo xalqini himoya qilishdan qo'l tortmadi, fidoyi Hizbulloh barcha to'siqlarga qaramay Islom Respublikasiga yordamga keldi, Iroq qarshiligi ham mardonavor ravishda xuddi shu yo'lni tutdi.

To'rtinchi qismda so'zim shu bir necha kunda qaysidir tarzda zarar ko'rganlarga qaratilgan: xoh aziz yoki azizlarining shahodati dog'ini boshdan kechirganlar bo'lsin, xoh jarohat olganlar bo'lsin, xoh uyi-joyi yoki ish joyiga zarar yetganlar bo'lsin. Bu qismda, birinchidan, yuksak martabali shahidlarning yaqinlariga chuqur hamdardligimni bildiraman. Bu men ushbu ulug' zotlar bilan baham ko'rgan umumiy tajribaga asoslanadi: judoligi dog'i umumxalq dardiga aylangan otamdan tashqari, katta umidlar bog'lagan aziz va vafodor turmush o'rtog'imni, o'zini ota-onasiga xizmat qilishga bag'ishlagan va oxir-oqibat o'z mukofotini olgan fidoyi singlimni hamda uning go'dak farzandini, shuningdek, olim va sharafli inson bo'lgan boshqa singlimning turmush o'rtog'ini shahidlar karvoniga topshirdim. Biroq musibatlarga sabr qilishni mumkin va hatto oson qiladigan narsa sabr qiluvchilar uchun qimmatli ajr haqidagi qat'iy va muqarrar ilohiy va'daga e'tibor qaratishdir. Shuning uchun sabr qilish va Haq taoloning (jalla va alo) lutfi va qo'llab-quvvatlashiga umid va ishonch bog'lash kerak.

Ikkinchidan, barchani ishontirib aytamanki, biz shahidlaringiz qonining intiqomidan voz kechmaymiz. Biz ko'zda tutgan intiqom faqat Inqilobning ulug' martabali Rahbari shahodatiga oid emas; balki dushman tomonidan shahid qilingan millatning har bir a'zosi intiqom ishi uchun mustaqil mavzudir. Albatta, bu intiqomning cheklangan qismi hozirgacha amalda ro'yobga chiqdi, biroq u to'liq amalga oshmaguncha, bu ish boshqa barcha ishlar ustida turaveradi va ayniqsa go'daklar va bolalarimizning qoniga nisbatan alohida ta'sirchanlik bilan yondashamiz. Shu sababli dushman Minobdagi «Shajarai Tayyiba» maktabi va ayrim shunga o'xshash holatlarda qasddan sodir etgan jinoyat ushbu ko'rib chiqishda alohida o'ringa ega.

Uchinchidan, ushbu hujumlarda jabrlanganlar albatta munosib tibbiy xizmatlarni bepul olishlari va ayrim boshqa imtiyozlardan bahramand bo'lishlari kerak.

To'rtinchidan, hozirgi vaziyat imkon bergan darajada, joylar va shaxsiy mol-mulkka yetkazilgan moddiy zararlarni qoplash uchun yetarli choralar belgilanib, amalga oshirilishi kerak. Oxirgi ikki masala muhtaram mas'ullar uchun bajarilishi shart bo'lgan vazifa bo'lib, ular uni bajarib, menga hisobot berishlari lozim.

Eslatib o'tishim kerak bo'lgan nuqta shuki, har qanday holatda ham biz dushmandan tovon undiramiz; agar u bosh tortsa, o'zimiz belgilagan miqdorda uning mol-mulkidan olamiz, agar bu ham imkonsiz bo'lsa, o'sha miqdorda uning mol-mulkini yo'q qilamiz.

So'zimning beshinchi qismi mintaqadagi ayrim mamlakatlarning rahbarlari va ta'sirli doiralariga qaratilgan. Biz o'n besh mamlakat bilan quruqlik yoki suv orqali qo'shnimiz va doimo ularning barchasi bilan iliq va samarali munosabatda bo'lishni istab kelganmiz va istaymiz, biroq dushman yillar oldin asta-sekin ushbu mamlakatlarning ba'zilarida mintaqa ustidan o'z hukmronligini ta'minlash uchun harbiy va moliyaviy bazalar barpo etgan. So'nggi hujumda ayrim harbiy bazalardan foydalanildi va tabiiyki, biz ochiq ogohlantirganimizdek, o'sha mamlakatlarga hech qanday tajovuz qilmagan holda, faqat o'sha bazalarga hujum qildik. Bundan keyin ham noiloj bu ishni davom ettiramiz, garchi o'zimiz va o'sha qo'shnilarimiz o'rtasida do'stlik zarurligiga hamon ishonsak-da. Bu mamlakatlar aziz Vatanimizga tajovuz qilganlar va xalqimiz a'zolarining qotillari bilan munosabatlarini aniq belgilab olishlari kerak. Men ularga o'sha bazalarni imkon qadar tezroq yopishni tavsiya qilaman; chunki ular hozirgacha Amerikaning xavfsizlik va tinchlik o'rnatish haqidagi da'vosi yolg'ondan boshqa narsa emasligini anglagan bo'lsalar kerak. Bu ularning odatda kufr jabhasi bilan hamkorlik qilish va uning kamsituvchi xatti-harakatlaridan norozi bo'lgan o'z xalqlari bilan aloqasi kuchayishiga, boyligi va qudrati ortishiga sabab bo'ladi. Yana takrorlayman, Islom Respublikasi tuzumi mintaqada hukmronlik va mustamlakachilik o'rnatishni istamagan holda barcha qo'shnilari bilan ittifoq va o'zaro iliq va samimiy munosabatlarga to'liq tayyor.

So'zimning oltinchi qismida so'zim shahid Rahbarimizga qaratilgan. Ey Rahbar! Ketishingiz bilan barchaning qalbiga og'ir dog' soldingiz. Siz doimo bunday oqibatga mushtoq edingiz, nihoyat Haq taolo uni muborak Ramazonning o'ninchi kuni tongida Qur'oni karimni tilovat qilib turgan holingizda sizga ato etdi. Ko'plab mazlumliklarni qudrat va hilm bilan ko'tardingiz va qoshingizni chimirmadingiz. Ko'pchilik sizning haqiqiy qadringizni bilmadi va ehtimol turli pardalar va to'siqlar ko'tarilib, uning ba'zi qirralari ma'lum bo'lishi uchun uzoq vaqt o'tadi. Umid qilamizki, pok nurlar, siddiqlar, shahidlar va avliyolar qurbida siz uchun hozirlangan yaqinlik maqomi sharofati bilan yana bu millat va Qarshilik jabhasining barcha xalqlari taraqqiyoti haqida qayg'urasiz va buning uchun vositachilik qilasiz, xuddi dunyoviy hayotingizda shunday bo'lganingizdek. Biz siz bilan ahd qilamizki, Haq jabhasining asosiy bayrog'i bo'lgan bu bayroqni yuksaltirish va sizning muqaddas maqsadlaringizga erishish uchun butun vujudimiz bilan harakat qilamiz.

Yettinchi qismda meni qo'llab-quvvatlagan barcha ulug' zotlarga, jumladan, buyuk taqlid marjalariga, turli madaniy, siyosiy, ijtimoiy shaxslarga va tuzumga bay'atni yangilash uchun shukuhli yig'ilishlarda ishtirok etgan xalq a'zolariga, shuningdek, uch hokimiyat tarmog'i mas'ullari va Muvaqqat rahbarlik kengashiga oqilona tadbirlari va harakatlari uchun minnatdorchilik bildiraman.

Umid qilamanki, bu fayzli soatlar va kunlarda Allohning xos lutflari butun Eron millatini, balki butun dunyo musulmonlari va mustaz'aflarini qamrab oladi.

Va nihoyat, Sarvarimizdan (Alloh taolo u zotning sharafli farajini tezlashtirsin) iltimos qilamanki, Qadr kechalari va kunlari hamda muborak Ramazon oyining qolgan qismida Haq taolo (jalla va alo) dargohidan millatimiz uchun dushman ustidan qat'iy g'alaba, shuningdek, izzat, keng rizq va ofiyat, ularning marhumlari uchun esa oxirat maqomlari va ofiyatini so'rasinlar.

والسّلام علیکم و رحمة‌اللّه و برکاته و تحیّاته
Sizlarga Allohning salomi, rahmati, barakotlari va tahiyyatlari bo'lsin.

Sayyid Mujtabo Husayniy Xomanaiy, 21-Esfand, 1404-yil, 1447-yil muborak Ramazonning 22-kuniga muvofiq

(1) Baqara surasi, 106-oyatning bir qismi