Bu, fars dilindəki orijinal mətnin tərcüməsidir. Fars dilində orijinal mətn
Mərhəmətli və Rəhmli Allahın adı ilə
Mübarək Qurban bayramını və İslami Şura Məclisinin birinci çağırışının açılışının ildönümünü İslami İranın bütün əziz millətinə və İslami Şura Məclisinin hörmətli deputatlarına təbrik edirəm və bu münasibətlə deputatların, xüsusilə İslami Şura Məclisinin hörmətli sədri cənab doktor Qalibafın ölkənin yüksəlişi yolundakı səylərini qədirşünaslıqla qeyd edirəm.
İslami Şura Məclisi millətin özəyi, dini xalq hakimiyyətinin təcəssümü və İslam Respublikasında qanun və qanunvericiliyin rüknüdür ki, xalqın iradəsinin həyata keçirilməsində mühüm rol oynayır. İndi üçüncü Müqəddəs Müdafiədən üç ay keçərkən İran xalqının iman, ümid və əməldəki batini əyarı və cövhəri dosta da, düşmənə də sübut olunmuş, İran xalqının səviyyəsinin yüksəlməsi isə millətin fəzilətlərinin özəyinin göz qamaşdıran bir təzahürünü ortaya qoymuşdur.
Millətin həqiqi nümayəndəsi millətin cinsindən olmalı olduğuna görə, hazırkı mərhələ xalqın oyanışının deputatlarda və İslami Şura Məclisində təzahürünün dönüş nöqtəsidir ki, onlar öz rollarını və məsuliyyətlərinin icrasını oyanmış millətin səviyyəsinə uyğun tənzimləsinlər və ikiqat iş və təşəbbüslə qanunvericilik və nəzarəti İslami İranın gələcəyinin relslərinin döşənməsi yolunda sürətləndirsinlər və dərinləşdirsinlər.
Bu cihad meydanında deputat kürsüsü ölkənin tərəqqisi yolunda dəyişikliyin ön cəbhə səngəri hesab olunur. Buna görə də millətin nümayəndələrinin Haqq-Taalanın (Onun cəlalı uca olsun) inayətlərinə təvəkkül edərək, Ağamıza və Mövlamıza (Uca Allah onun şərəfli zühurunu tezləşdirsin) təvəssül edərək və iki Amerika-sionist təhmil olunmuş müharibəsinin məzlum şəhidlərinin və onların başında uca məqamlı şəhid rəhbərimizin (Allah onun şərəfli məqamını uca etsin) pak qanlarına ehtiram göstərərək, mücahidanə şəkildə bütün güc və imkanlarını qanunverici hakimiyyətin müstəqilliyini qorumaqla yanaşı hökumət və digər qurumlarla bir-birini tamamlayan idarəçiliyə, ölkənin layiqli yeniləşməsinə, xalqın qayğılarının, xüsusilə iqtisadi və məişət problemlərinin həllinə, istehsalın və məşğulluğun canlandırılmasına, elm və sənayenin səviyyəsinin artırılmasına, mədəniyyət və əxlaqın yüksəldilməsinə, maliyyə korrupsiyası ilə mübarizəyə, inflyasiya və bahalığın cilovlanmasına və məhrumiyyətin hərtərəfli aradan qaldırılmasına sərf etmələri layiqdir.
Buna əsasən Məclisin qərarlarının ölkənin əsas məsələləri və xalqın ehtiyacları ilə birbaşa və görünən bir əlaqəsi olmalı və ümid yaratmağa və ölkənin gələcəyinin qurulmasına yönəlməlidir. Cəmiyyət hər şeydən əvvəl ümidin real nişanələrini, sabit bir yolu və gələcəyə dair aydın bir perspektivi görməyə ehtiyac duyur ki, ona əsasən planlaşdırma aparsın və hərəkət etsin; Məclis deputatları öz mövqeləri, qərarları və çıxışları ilə İslami Şura Məclisini ümid yaradan aparıcı bir quruma çevirə bilərlər; o cümlədən hazırkı vəziyyətdə icra və məhkəmə hakimiyyətləri ilə birgə, 1405-ci ildə «Milli birlik və milli təhlükəsizlik kölgəsində müqavimət iqtisadiyyatı» şüarına diqqət yetirərək, iqtisadi sabitliyi, inflyasiyanın azaldılmasını, likvidliyin idarə olunmasını, istehsalın canlandırılmasını, Yeddinci İnkişaf Proqramının islahını və ona ikinci və üçüncü təhmil olunmuş müharibələrin vurduğu zərərlərin yeniləşdirilməsi və bərpası ilə bağlı bəndlərin əlavə edilməsini əsas gündəliyə çıxarsınlar və hökumətin və digər sahələrin hazırkı şəraitdə və müharibədən sonrakı dövrdə hərəkətinin yol xəritəsini cızsınlar.
Oyanmış millətin səviyyəsinə layiq bir rol oynamaq üçün müxtəlif müqəddimələr və tələblər də lazımdır ki, bu qısa fürsətdə yalnız hörmətli qardaş və bacılara uca məqamlı şəhid rəhbərimizin (Allah onun şərəfli məqamını uca etsin) İslami Şura Məclisinin deputatları ilə illik görüşlərində, xüsusilə mühüm təcrübi və əməli dəyərə malik olan son illərdəki görüşlərdə buyurduqlarının təfərrüatını diqqətlə və ciddi şəkildə öyrənməyi tövsiyə edirəm.
Təbiidir ki, fərdi təqvaya riayət həmin göstərişlərə əməl olunmasının təmin edilməsində və hazırkı həssas mərhələdə ağır vəzifələrin düzgün yerinə yetirilməsində əsas rol oynayır; prioritetlərin düzgün müəyyənləşdirilməsi, araşdırmalara və dərin ekspert məsləhətləşmələrinə əsaslanan səslər, xalqa yaxın həyat tərzi və xalqla geniş əlaqə, hərtərəfli korrupsiya ilə mübarizə, milli maraqların və ictimai tələblərin cinah, qrup və regional ehtiyac və maraqlardan üstün tutulması, parlament diplomatiyasına diqqət, istikbarçıların həddini aşan tələbləri qarşısında cəsarət və şəffaf və qətiyyətli mövqelərin bəyan edilməsi, İranın regionda və dünyadakı yeni mövqeyinə ağıllı və inqilabi diqqət də bu tələblər sırasındadır.
Təqvanın nümunələrindən biri də İslami İranın bayrağı ətrafında oyanmış millətə bəxş edilmiş və böyük şeytan qarşısında zəfərin ən mühüm amillərindən olan milli birlik və əvəzsiz həmrəylik kimi böyük nemətə riayət etməkdir. Bu ilahi lütfün şükrü millətin hər bir fərdinin, xüsusilə fikir və siyasət elitasının, o cümlədən Məclis deputatlarının bu birliyin qorunmasına səy göstərməsi və boş siyasi ixtilaflardan və ictimai fərqlərin qabardılmasından çəkinməsidir.
Düşmənin təhmil olunmuş müharibədən, iqtisadi təzyiqdən və təbliğati və siyasi mühasirədən sonrakı kor planı hərbi meydandakı məğlubiyyətlərin əvəzini çıxmaq və milləti diz çökdürmək üçün təfriqə salmaq və ictimai parçalanma yaratmaqdır; İslam və inqilab, yaxud İranın müstəqilliyi və başıucalığı üçün ürəyi döyünən bütün fədakarların hər biri bundan sonra millətin həmrəy və bir-birinə bağlı səflərinin birliyini qorumaq üçün hər zamankından daha çox səy göstərməli, əsassız və hətta əsaslı ixtilafları çəkişmə və təfriqəyə çevirməməli və sözdə də, əməldə də millətin həmrəyliyinin və vəhdətinin təcəssümü olmalıdırlar, inşallah.
Zülm və təcavüzə, vəhşi və murdar zalımlara qarşı sinəsini sipər edən və tarixi onun düzgün istiqamətinə yönəldən layiqli millətin nümayəndəliyi kimi çox ağır vəzifədə sizə uğurlar arzulayıram. Ümid edirəm ki, Ağamızın (Uca Allah onun şərəfli zühurunu tezləşdirsin) duası siz əzizlər üçün dəstəkçi, doğru yola yönəldən və ilahi uğurları cəlb edən olsun.
Allahın salamı, rəhməti və bərəkətləri sizə olsun. Seyid Müctəba Hüseyni Xamenei, 7 xordad 1405