Peyam bi boneya salvegera vekirina Meclîsa Şûraya Îslamî û…

Ev wergera metna esil a farisî ye. Metna esil bi farisî

بسم الله الرّحمن الرّحیم
Bi navê Xwedayê Rehman û Rehîm

Ez Cejna pîroz a Qurbanê û salvegera vekirina dewra yekem a Meclîsa Şûraya Îslamî li hemû miletê delal ê Îrana Îslamî û nûnerên rêzdar ên Meclîsa Şûraya Îslamî pîroz dikim, û bi vê boneyê spasiya hewldanên nûneran, bi taybetî Serokê rêzdar ê Meclîsa Şûraya Îslamî birêz Dr. Qalîbaf, di rêya bilindkirina welêt de dikim.

Meclîsa Şûraya Îslamî kakila miletî, nîşana demokrasiya olî (gelserweriya dînî) û stûna qanûn û qanûndanînê di Komara Îslamî de ye, ku di bicihanîna îradeya gel de roleke girîng heye. Niha, bi derbasbûna sê mehan ji Berevaniya Pîroz a sêyem, qedr û cewhera hundirîn a gelê Îranê di bawerî, hêvî û kirinê de ji dost û dijmin re hatiye îspatkirin, û bilindbûna asta gelê Îranê dîmeneke balkêş a kakila fezîletên miletî derxistiye holê.

Ji ber ku nûnerê rastîn ê miletî divê ji cinsê miletî be, qonaxa niha xala werçerxê ya xuyabûna rabûna gel di nûneran û Meclîsa Şûraya Îslamî de ye, da ku rolgirtin û bicihanîna berpirsiyariya xwe li gorî asta miletê rabûyî eyar bikin û bi kar û nûjeniya ducarî, qanûndanîn û çavdêriyê di rêya danîna rêyên pêşeroja Îrana Îslamî de bilez û kûr bikin.

Di vê meydana cîhadê de, kursiya nûnertiyê wekî sengera xeta pêşî ya guherînê di rêya pêşketina welêt de tê hesibandin. Ji ber vê yekê, layiq e ku nûnerên miletî bi pişta xwe dayîna alîkariyên Xwedayê Heq (Mezin û Bilind be) û tewesula bi Serwer û Mewlayê me (Xwedê zû fereca wî bîne), û bi parastina xwînên pak ên şehîdên mazlûm ên du şerên ferzkirî yên Amerîkî-Siyonîst û di serê wan de Rêberê me yê Mezin ê şehîd (Xwedê payeya wî ya bilind bilindtir bike), bi awayekî mucahidane hemû hêz û şiyana xwe ji bo rêveberiyeke hevhêz bi hikûmet û saziyên din re, di heman demê de bi parastina serxwebûna hêza qanûndanînê, di rêya nûkirina layiq a welêt de, çareserkirina xemên gel bi taybetî mijarên aborî û debarê, geşkirina hilberîn û kar, bilindkirina asta zanist û pîşesaziyê, bilindkirina çand û exlaqê, têkoşîna li dijî gendeliya darayî, kontrolkirina enflasyon û bihabûnê û rakirina hemlayenî ya bêparmayînê xerc bikin.

Li ser vê bingehê, pêwîst e ku biryarên Meclîsê bi pirsgirêkên sereke yên welêt û hewcedariyên gel re têkiliyeke rasterast û xuya hebe û ber bi hêvîafirandin û avakirina pêşeroja welêt ve be. Berî her tiştî civak hewcedarê dîtina nîşanên rastîn ên hêviyê, rêyeke aram û dîmeneke ronak a pêşerojê ye, da ku li ser bingeha wê plan bike û tevbigere; û nûnerên Meclîsê bi helwest, biryar û axaftinên xwe dikarin Meclîsa Şûraya Îslamî bikin saziya pêşeng a hêvîafirandinê; ji wan, di rewşa niha de, bi hevrêtiya hêzên cîbicîkar û dadwerî û bi balkişandina li ser dirûşma «Aboriya berxwedêr di bin siya yekîtiya neteweyî û ewlehiya neteweyî de» di sala 1405an de, aramiya aborî, kêmkirina enflasyonê, birêvebirina likwîdîteyê, geşkirina hilberînê, sererastkirina Plana Heftem a Pêşketinê û zêdekirina xalên têkildarî nûkirin û ji nû ve avakirina ziyanên şerên ferzkirî yên duyem û sêyem bikin rojeva sereke û nexşeya rê ya tevgera hikûmet û beşên din di şert û mercên niha û serdema piştî şer de xêz bikin.

Ji bo lîstina roleke li gorî asta miletê rabûyî, gelek pêşmerc û pêwîstiyên cuda jî hewce ne, ku di vê derfeta kurt de ez tenê ji bira û xwişkên rêzdar re şîret dikim ku bi hûrbînî û bi cidî hûrguliyên gotinên Rêberê Mezin ê şehîd (Xwedê payeya wî ya bilind bilindtir bike) di hevdîtinên salane yên bi nûnerên Meclîsa Şûraya Îslamî re, bi taybetî yên salên dawî ku xwediyê nirxeke girîng a ezmûnî û pratîkî ne, bixwînin.

Xwezayî ye ku parastina teqwaya takekesî di misogerkirina pêkanîna wan rênîşandanan û bicihanîna rast a erkên giran di vê demê hestiyar de roleke bingehîn dilîze; û naskirina rast a pêşengiyan, dengdana li ser bingeha lêkolîn û şêwirînên kûr ên pisporan, jiyana bi gel re û têkiliya berfireh bi gel re, têkoşîna hemlayenî ya li dijî gendeliyê, pêşdexistina berjewendiyên neteweyî û daxwazên giştî li ser hewcedarî û berjewendiyên aliyî, komî û herêmî, balkişandina li ser dîplomasiya parlamentoyê, wêrekî û ragihandina helwestên zelal û bi hêz li hember zêdexwaziyên mustekbiran, û balkişandina jîr û şoreşgerî li ser rewşa nû ya Îranê li herêmê û cîhanê ji van pêwîstiyan in.

Ji mînakên teqwayê, parastina nîmeta mezin a yekîtiya neteweyî û hevgirtina bêhempa ye ku li dora ala Îrana Îslamî ji miletê rabûyî re hatiye bexşandin û ji girîngtirîn faktorên serkeftinê li hember Şeytanê Mezin e. Şukra vê diyariyê, xîreta hemû endamên miletî, bi taybetî elîtên fikrî û siyasî di nav de nûnerên Meclîsê, ji bo parastina vê yekîtiyê û dûrketina ji nakokiyên siyasî yên pûç û derxistina pêş a cudahiyên civakî ye.

Plan û nexşeya kor a dijmin piştî şerê ferzkirî, zexta aborî û dorpêça propagandayî û siyasî, çêkirina perçebûn û parçebûna civakî ye ji bo telafîkirina têkçûnên qada leşkerî û çokdanîna miletî; û pêwîst e ku her yek ji canfidayên ku dilê wan ji bo Îslam û Şoreşê an ji bo serxwebûn û serbilindiya Îranê lê dide, ji vir û pê ve ji berê bêtir ji bo parastina yekîtiya rêzên hevgirtî û bi hev ve girêdayî yên miletî xîret bikin, nakokiyên bê bingeh û heta yên bi bingeh jî nekin şer û perçebûn, û bi gotin û kirinê nîşana hevgirtin û yekparçeyiya miletî bin, inşallah.

Ji bo we, di erka pir giran a nûnertiya miletekî layiq de ku li hember zulm û destdirêjiya hov û xerabên dewranê sîngê xwe kiriye mertal û dîrokê ber bi aliyê wê yê rast ve dibe, serkeftinê hêvî dikim. Bi hêviya ku duaya Serwerê me (Xwedê zû fereca wî bîne) ji bo we yên delal piştgir, rênîşander û kişînerê serkeftinên Xwedayî be.

والسّلام‌ علیکم و رحمةالله و برکاته
Silav, rehmet û bereketên Xwedê li ser we be.
Seyid Mucteba Huseynî Xamineyî
7ê Xurdada 1405