ممتاز صلاحیتوں کے حامل افراد اور علمی و کھیلوں کے میدان کے تمغہ یافتگان کے نام پیغام

یہ اصل فارسی متن کا ترجمہ ہے۔ اصل فارسی متن

بسم اللہ الرحمن الرحیم

ایک روایت کے مطابق یہ ایام جنت کی خواتین کی سردار و سیدہ، حضرت صدیقۂ اطہر، فاطمہ زہرا صلوات اللہ و سلامہ علیہا کی شہادت کے ایام سے مصادف ہیں۔ عجیب بات ہے کہ آپ کی شہادت کا زمانہ نامعلوم رہ گیا؛ جس طرح اس نورِ الٰہی کی تدفین کا باشرف مقام پوشیدہ رہ گیا، اور اعلیٰ مرتبے میں آپ کی قدر و منزلت بھی نامعلوم اور انسانی فہم سے بالاتر ہے۔ آپ عبادت، عبودیت اور اللہ کی بندگی میں ایک مثالی شخصیت ہیں؛ پیغمبرِ اعظم کی خاص اور ہمہ جہت ہمراہی، امیر المومنین صلوات اللہ و سلامہ علیہما و آلہما کی ولایت کے جاں نثارانہ دفاع، معرفت سکھانے اور تعلیم دینے، موقع شناسی اور حق کے لیے قیام، اور استقامت و تبیین میں مثالِ اعلیٰ ہیں؛ صبر، فداکاری، ایثار، بے منت خدمت اور معاشرے میں ہمدردی و غمخواری میں اوّل درجے کا اسوہ ہیں؛ شریکِ حیات ہونے، ماں ہونے، اولاد کی تربیت اور ائمۂ اطہار صلوات اللہ و سلامہ علیہم کی نسل کی پرورش میں، جو انسانیت کے رہبر ہیں، نمونہ ہیں؛ سعی و کوشش، مجاہدت، پاکیزگی، آراستگی، تقویٰ، نورانیت اور معنویت میں نمونہ ہیں؛ اور ایک لفظ میں تمام باایمان خواتین و مردوں کے لیے اسوہ ہیں۔ فاطمی معاشرے کے درخشاں فضائل میں سے ایک یہ ہے کہ وہ ایران کی انقلابی اور مسلمان قوم کے لیے بڑی سماجی تحریکوں، جدوجہد، جہاد اور عوامی تحریکوں کے میدانوں اور محاذوں میں موجودگی، حتیٰ کہ علمی میدانوں میں ترقی کے عزم اور منکسرانہ و بے منت خدمت گزاری کا روڈ میپ کھولتا ہے۔

ہمارا عزیز ایران اس دور میں سب سے بڑھ کر عزم و امید کا مظہر ہے، اور اس امید و ترقی اور اس کے درخشاں مستقبل کی راہ میں قدم رکھنے میں ایران کے ممتاز صلاحیتوں کے حامل افراد اور باصلاحیت و توانا نوجوانوں کا کردار بے مثال ہے۔ لیکن ممتاز صلاحیت کا جغرافیہ علم و ٹیکنالوجی یا کھیل اور مختلف مہارتوں کے میدان تک محدود نہیں ہے۔ ہر قسم کا مثبت اور مطلوب امتیاز ممتاز صلاحیت کو وجود بخش سکتا ہے۔ ان دنوں ہم اس سرزمین کے لوگوں میں سے ایسے برگزیدہ افراد کی ممتاز صلاحیت کا جلوہ دیکھ رہے ہیں جو ایک وسیع تر افق پر نظر رکھتے ہوئے اپنے وطن کے مقدس پرچم کی سربلندی کی راہ میں مجاہدت کر رہے ہیں۔ یہ بصیرت اور جہاد کے ممتاز افراد ہیں۔ ہم «ریز علی خواجوی» اور «علی لندی» جیسے افراد کو ایسے ممتاز افراد سمجھتے ہیں جن کے نام ثقافتی مقامات کے صدر دروازوں پر درج ہونے چاہییں، اور معاشرے کے انہی منتخب پھولوں میں وہ شہداء اور ایثار گر بھی ہیں جنہوں نے اپنی جان اور اپنی صحت کی قربانی دے کر اسلامی ایران اور اس کی عزیز قوم کی تقدیر پر غیر معمولی اثر چھوڑا اور معبودِ یکتا سے بندگی کا تمغہ حاصل کیا۔

سب سے پہلے، موقع کو غنیمت جانتے ہوئے، فلکیات و فلکی طبیعیات، ریاضیات، ارضیاتی علوم، جغرافیہ، طبیعیات، کیمیا، حیاتیات، کمپیوٹر و مصنوعی ذہانت اور انسانی علوم کے اولمپیاڈز میں متعدد اعزازات، تمغوں اور علمی افتخارات کے حصول، نیز کھیلوں کے حالیہ مختلف اعزازات پر اپنے ملک کے تمام عزیز عوام اور ایک ایک افتخار آفرین کو مبارکباد پیش کرتا ہوں، اور نوعمروں اور نوجوانوں سے لے کر کوچوں، اساتذہ اور دانشوروں تک تمام ممتاز طبقات میں افتخار و امید کے قافلے کے پیشروؤں اور ملکی ترقی کے پرچم داروں کے عزم و ارادے کی تعظیم اور قدردانی کرتا ہوں۔ ملک میں تبدیلی کے لیے ممتاز افراد کا جذبہ اور امید ایک فروزاں شعلہ ہے جس کا میں گزشتہ برسوں اور دہائیوں کے دوران دور و نزدیک سے مشاہدہ کرتا رہا ہوں، اور ملک میں ممتاز افراد اور علمی دھارے کی عظیم اور امید آفرین تحریک کا، اور علمی شعبوں، اولمپیاڈز اور کھیلوں میں بار بار، پے در پے اور ہر سال حاصل ہونے والی چیمپئن شپس میں اس تحریک کے جلووں کا مشاہدہ پوری ایرانی قوم کے لیے باعثِ افتخار اور باعثِ ناز ہے۔

حالیہ دنوں اور مہینوں میں مختلف کھیلوں میں ہمارے ملک کے محنتی کھلاڑیوں کی درخشاں پوزیشنیں اور نئے ریکارڈز کا قائم ہونا ان کی کوشش، ہمت، ارادے اور ایمان کی حکایت کرتا ہے۔ وہ کھلاڑی جو اپنی جسمانی طاقت، روحانی، اخلاقی اور ایمانی قوت اور اپنی مسلسل کوشش سے تمام قوموں کی نظروں کے سامنے عزیز ایران کے اقتدار میں اضافہ کرتے ہیں اور غیور ایرانی قوم کی زندہ دلی کو پوری دنیا کے سامنے نمایاں کرتے ہیں؛ وہ خواتین کھلاڑی جو دنیا میں ایرانی خاتون کے پردے کی باعثِ افتخار علامت کو درخشاں کرتی ہیں؛ وہ تمغہ جیتنے والے کھلاڑی جو ایرانی قوم کے دل میں خوشی اور جوش و ولولہ پیدا کرتے ہیں اور اسلامی ایران کے سربلند پرچم کو عزت بخشتے ہیں؛ ان میں سے ہر ایک اپنی بساط کے مطابق طاقتور ایران کو معنی بخشنے میں شریک اور مؤثر ہے۔

چونکہ یہ ایام یونیورسٹیوں، دینی حوزوں اور اسکولوں میں نشاط اور علم و تحقیق کی طرف توجہ کے ایام ہیں، اس لیے میں مناسب سمجھتا ہوں کہ اس سلسلے میں علم کے شائقین، قوم کے ممتاز افراد اور عزیز ایران کے دانشوروں سے ایک مختصر بات کروں۔

ممتاز صلاحیت ایک الٰہی نعمت اور عطیہ ہے اور اس کا بنیادی سرمایہ استعداد اور ذہانت ہے، اور ایرانی قوم، خصوصاً ہمارے ملک کے نوجوان، اس نعمت اور خدا کی عطا کردہ عظیم دولت سے بہرہ مند ہیں۔ عقل اور بندگی کا تقاضا یہ ہے کہ انسان الٰہی نعمت کا شکر بخوبی ادا کرے، اور اگر شکر اپنے تمام قلبی، زبانی اور عملی مراتب میں ادا ہو تو اس نعمت کے کمال تک پہنچنے کا راستہ ہموار ہو جاتا ہے۔ ممتاز صلاحیت کی نعمت کی قدردانی بھی پہلے خود اس ممتاز فرد کی جانب سے اور پھر بعد کے مراتب میں اس کے ارد گرد کے ماحول، یعنی ماں باپ، خاندان، معلم اور استاد سے لے کر اسکول اور یونیورسٹی کی فضا اور ملک کے نظام تک، کی جانب سے ہونی چاہیے، تاکہ وہ اس صلاحیت کو پروان چڑھائے، اسے فزوں تر کرے اور اسے صحیح طور پر بروئے کار لائے۔ اسی بنیاد پر ممتاز فرد پر اس نعمت کے عملی شکر کی بھاری تر ذمہ داری عائد ہوتی ہے اور شایستہ ہے کہ وہ اپنی ممتاز صلاحیت کو توانا بنانے اور فروغ دینے کے ساتھ ساتھ اس استعداد کو ملک اور معاشرے کے مسائل کے حل میں بہترین طریقے سے استعمال کرے۔

ممتاز فرد وہ نہیں جو محض قابلِ توجہ استعداد اور ذہانت رکھنے کی بنا پر، خود کو سب سے الگ اور نرالا سمجھتے ہوئے، صرف اپنی وقتی اور ذاتی خواہشات کے بارے میں سوچے؛ ممتاز فرد وہ ہے جسے اپنی استعداد کو پروان چڑھانے کی فکر ہو، جو خود کو معاشرے کا ایک مؤثر عنصر سمجھے اور اپنی استعداد اور صلاحیت کو بیک وقت اپنی اور اپنے معاشرے کی ترقی کے لیے استعمال کرے۔ ایران کے ممتاز افراد نے ثابت کیا ہے کہ علم اور استعداد کو عوام اور ملک کے حقیقی مسائل کے حل کا ذریعہ بنایا جا سکتا ہے، اور اسٹیم سیلز، نینو اور بایو ٹیکنالوجی سے لے کر ہوا بازی و خلا، صنعت، کان کنی، طب، زراعت، جوہری توانائی، توانائی اور بنیادی ڈھانچے کی جدید ٹیکنالوجیز تک، اپنے علم و دانش اور ممتاز صلاحیت کو عملی شکل دینے کی جستجو کی جا سکتی ہے۔ ہم سب حقیقی زندگی میں اس پیش رو تحریک کے آثار اور جلوے دیکھ رہے ہیں۔ بجلی گھروں میں ایرانی ٹربائنوں سے بجلی کی پیداوار، جنوبی جزیروں کے پانی صاف کرنے کے پلانٹس میں علم پر مبنی ٹیکنالوجی، زرعی عمل اور پانی و مٹی کے بہتر استعمال کے لیے شمالی کھیتوں، باغوں اور دھان کے کھیتوں پر زرعی ڈرونز کی پرواز، رویان کی جدید ٹیکنالوجیز کے ذریعے بے اولاد خاندانوں کے ہاں بچوں کی ولادت، ریڈیو ادویات کے ذریعے لاعلاج بیماریوں کی تشخیص اور علاج، سینسنگ سیٹلائٹس کے ذریعے زمین، پانی اور فصلوں کی نگرانی، اور علمی و تکنیکی اختراعات کے ذریعے پیداواری صلاحیت اور غذائی تحفظ میں اضافہ، اس عظیم اور بابرکت مجموعے کی محض چند قابلِ بیان مثالیں ہیں، اور ان جیسی بہت سی دیگر کامیابیوں نے، خصوصاً دفاعی اور فوجی میدانوں میں، اپنے وقت پر بارہا دنیا کی آنکھوں کو خیرہ کیا ہے اور آئندہ بھی ایسا ہی ہوگا۔

طاقتور ایران علمی اور تکنیکی اقتدار کی بنیاد پر استوار ہے اور یہ محور عالمی مساوات اور نئے عالمی نظم میں ایران کے کردار کے اہم ترین عناصر میں سے ایک ہے۔ لہٰذا اسے زیادہ سے زیادہ طاقتور بنانے کی کلید یہ ہے کہ ممتاز افراد ملک کے علمی مسائل میں سرحدیں توڑیں اور حل کی راہیں کھولیں، اور سائنسدانوں اور ممتاز افراد کے خلاف اسلامی ایران کے دشمنوں کی خباثت اور جرائم ملک کی طاقت میں ممتاز افراد کے مؤثر کردار کو ظاہر کرتے ہیں۔ وہ دشمن جو ہمارے معاشرے کے نمایاں سائنسدانوں اور مؤثر ممتاز افراد کو دوسری اور تیسری مسلط کردہ جنگوں میں، اور البتہ ان سے برسوں پہلے بھی، ان کے علمی ماحول اور معمول کی زندگی میں قتل کرتا ہے، ایران کی ترقی اور اقتدار کو دیکھ نہیں سکتا اور عزیز ایران کے ممتاز افراد کو کمزور کرنے کے لیے اپنے تمام ذرائع اور طریقے استعمال کرتا ہے؛ مایوس اور ناامید کرنے سے لے کر ان کے ذہن و روح پر قبضہ کرنے، انہیں نئے استعمار کے معدے میں ہضم کرنے اور انہیں مغرب کی لوٹ مار اور سرمایہ سالاری کی مشین کے پرزے بنا دینے تک؛ اس بات سے غافل کہ اس قوم کے شہید ممتاز افراد، سائنسدانوں، اساتذہ، یونیورسٹی طلبہ اور اسکول کے طالب علموں کے خون کا ایک ایک قطرہ عزم و ترقی کا طوفان برپا کر چکا ہے اور کر رہا ہے۔

ایرانی قوم کو اپنی قدیم تہذیب کا سابقہ، علوم و فنون میں اپنے گوناگوں افتخارات اور دنیا کے نامور مفاخر و سائنسدانوں سے بہرہ مندی یاد ہے، اور اس کے ساتھ قاجار اور پہلوی ادوار کی دو صدیوں کی شدید پسماندگی اور تاریخی انفعال بھی۔ یہ قوم «اَلعِلمُ سلطان» (علم طاقت ہے) کی کامیاب بالاتر حکمت عملی کی قدر و قیمت، مغرب کے علمی تسلط کو قبول نہ کرنے میں اس کے نتائج، اور گزشتہ تین دہائیوں میں ممتاز افراد کی تیز رفتار علمی و تحقیقی ترقی سے واقف ہے، جس کا ایک قابلِ توجہ حصہ عظیم الشان شہید رہبر قدس اللہ نفسہ الزکیہ کی خاص تدابیر اور رہنمائیوں کا مرہونِ منت ہے۔ اگر موجودہ مرحلے اور تیسری مسلط کردہ جنگ سے پہلے تک نئی علمی تحریک ممتاز افراد کے لیے ایک لازمی اور ضروری سفارش تھی، تو حالیہ دو جنگوں کے تجربے نے سب پر ثابت کر دیا کہ یہ نئی علمی تحریک گہری اور تیز رفتار ہونی چاہیے۔ اس مقصد کے لیے ضروری ہے کہ علمی، تحقیقی اور تکنیکی اداروں اور مراکز کے حکام کے علاوہ عزیز ایران کا ایک ایک ممتاز فرد اور دانشور اسلامی ایران کے شاندار مستقبل کی تعمیر اور اس کی ترقی و آبادانی میں اپنے بنیادی مشن کا اہتمام کرے اور درج ذیل نکات پر توجہ دے:

اوّلاً، ملک میں بنیادی علوم اور انسانی علوم کی ترقی کے لیے ایک سنجیدہ، دقیق اور عملی پروگرام موجود ہو۔ طبیعیات، کیمیا، حیاتیاتی علوم اور ریاضی جیسے بنیادی علوم کی ترقی و توسیع، جو دیگر علوم اور اطلاقی ٹیکنالوجیز کی بنیادی اساس ہیں، ملک کی علمی اور تکنیکی ترقی کا محرک ہے۔ جو بھی قوم کسی مقام تک پہنچی ہے، بنیادی علوم کے ذریعے پہنچی ہے، اور جو ملک ان علوم میں ترقی نہ کرے وہ ہمیشہ پیچھے رہ جاتا ہے۔

ثانیاً، نامکشوف حقائق پر توجہ مرکوز کرنا، بنیادی علوم میں سرحدیں توڑنا، اور ان علوم، خصوصاً ریاضیات، کے مشہور حل طلب مسائل کو حل کرنے کے لیے ایک ہدف اور منزل کے طور پر مسلسل مقابلہ، ہمیشہ توجہ کا مرکز رہے۔

ثالثاً، علمی تحریک کا کلیدی نکتہ تخلیقی صلاحیت اور جدت ہے۔ تخلیقی صلاحیت اور مثبت تخیل کو، جو تمام یا بیشتر علوم میں ترقی اور گشائش کا بنیادی عنصر ہے، میدان دینا، ایجاد، تخلیق اور اختراع کے لیے علمی جرأت، اور نئی اور ناآزمودہ راہوں کو آزمانے کے لیے ذاتی اور قومی خود اعتمادی میں اضافہ، بہت ضروری اور مفید ہے۔ ہر اس شخص کے لیے قابلِ قبول اور پرکشش ترغیبات مقرر کرنا جو کوئی کارگر تخلیقی کام پیش کر سکے، اس امر کی زمینہ سازی میں مؤثر ہے۔

رابعاً، علمی مسائل کے حل میں خود انحصاری، بنیادی ڈھانچے کی فراہمی اور سرحدوں سے ماورا سرگرمی و عمل کے لیے تکنیکی رکاوٹوں کا خاتمہ، عالمی سطح پر نئے افق کھولنے کے لیے داخلی ڈھانچے کے استحکام کا ایک امتزاج پیدا کرتا ہے۔

خامساً، تجرباتی اور عملی شعبوں کے ممتاز افراد کی صلاحیتوں کو میدان دینا، منجملہ طالب علمی کے ابتدائی برسوں ہی سے صنعت کو یونیورسٹی سے جوڑنا اور علم پر مبنی کاروباروں کو سہولت فراہم کرنا، علم کو بروئے کار لانے اور ممتاز افراد کی ترقی میں اہم کردار رکھتا ہے۔ ملک کی علمی اور تکنیکی صلاحیتوں کو ہم سمت کرنا، اور ممتاز افراد اور علمی و تحقیقی مراکز کا علم پر مبنی کمپنیوں، صنعتوں اور حتیٰ کہ اسٹارٹ اپس سے رشتہ مضبوط کرنا، اور اس کے ساتھ ساتھ علم سے لے کر صرف تک کی زنجیر کی انتظامی اداروں کی جانب سے حمایت، ملک کے آج اور کل کے اہم مسائل، جیسے پانی، مٹی، غذا اور توانائی سے لے کر مصنوعی ذہانت تک، کے محور پر، استاد اور طالب علم کی میزِ کار کو یونیورسٹیوں اور تحقیقی مراکز کی تجربہ گاہوں سے ورکشاپوں اور کارخانوں سے جوڑ سکتا اور وہاں منتقل کر سکتا ہے۔ تیز رفتار جست اسی صورت میں حاصل ہوتی ہے جب معاشی مفادات اور مصنوعات و خدمات کی تجارتی منڈی، ممتاز افراد کے جذبے اور ارادے کے ساتھ گھل مل جائیں اور علم و تحقیق کے ادارے کا صنعت اور صارف منڈی سے پائیدار اور مسلسل رابطہ قائم کریں۔

اسی طرح یونیورسٹی اور دینی حوزے کے مختلف نظری اور تجرباتی شعبوں کے ممتاز افراد کا منصوبہ بندی اور پالیسی سازی کی سطحوں پر براہِ راست اور مؤثر کردار ملک کی ترقی میں نمایاں مدد کرتا ہے، اور حکام کا فرض ہے کہ وہ پرعزم ممتاز افراد کی انفرادی صلاحیتوں، عقلانیت اور اجتماعی دانش سے بھرپور استفادہ کریں۔

اگر یہ راستہ صحیح طور پر طے کیا جائے تو علم کا مرکزِ ثقل اور اس کے مراکز، خصوصاً بعض بنیادی علوم کے، بتدریج مغربی ممالک سے ایران منتقل ہو جائیں گے، اور ملک کچھ زیادہ دور نہیں برسوں میں ایک علمی اور تکنیکی مرجع بن جائے گا، اور فارسی کو دنیا کی علمی مرجع زبانوں میں سے ایک بنانے کے بارے میں ہمارے حکیم اور شہید رہبر اعلی اللہ مقامہ الشریف کا پہلے بیان کردہ ہدف پورا ہو جائے گا۔

ان شاء اللہ، ممتاز صلاحیت کے میدان کے شہیدوں کے خون کی برکت اور ہمارے سید و مولا عجل اللہ تعالیٰ فرجہ الشریف کی دعائے خیر سے، قوم کے ممتاز افراد اور دانشوروں کی گہری اور تیز رفتار علمی تحریک، اور نئی اسلامی ـ ایرانی تہذیب تک پہنچنے کے لیے زیادہ سے زیادہ طاقتور ایران کی ہمہ جہت ترقی، متحقق اور میسر ہو۔

سید مجتبیٰ حسینی خامنہ ای، ۴ آبان ۱۴۰۵