وەڵامی ڕێبەری شۆڕشی ئیسلامی بۆ نامەی بەیعەتی سکرتێری گشتی و تێکۆشەرانی حیزبوڵڵای لوبنان
ئەمە وەرگێڕانی دەقی ڕەسەنی فارسییە. دەقی ڕەسەن بە فارسی
بسم الله الرّحمن الرّحیم
بە ناوی خوای بەخشندەی میهرەبان
«يَا أَيُّهَا الَّذِينَ آمَنُوا قَاتِلُوا الَّذِينَ يَلُونَكُمْ مِنَ الْكُفَّارِ وَلْيَجِدُوا فِيكُمْ غِلْظَةً...» (1)
ئەی ئەوانەی باوەڕتان هێناوە، بجەنگن لەگەڵ ئەو بێباوەڕانەی کە لێتانەوە نزیکن، و با توندی و ڕەقی لە ئێوەدا ببینن... (قورئان، تەوبە ٩: ١٢٣)
جەنابی حوججەتولئیسلام ولموسلیمین شێخ نەعیم قاسم (دام‌عزّه)، سکرتێری گشتیی بەڕێزی حیزبوڵڵای لوبنان، و هەموو فەرماندەران و تێکۆشەرانی گیان لەسەر دەست، ئارامگر و خۆڕاگری حیزبوڵڵا
السّلام علیکم جمیعاً و رحمةالله (سڵاو و ڕەحمەتی خوا لە هەمووتان بێت)
نامەکەی ئێوە، برایان و کوڕانم، تێکۆشەرانی باوەڕدار و ئازای حیزبوڵڵای سەربەرز، کە هەڵگری پەیامی پایەداری و خۆڕاگری بوو بۆ بەرزکردنەوەی وشەی خوا و باوەڕبوون بە بەڵێنەکانی قورئانی مەزن و ئامانجە شکۆبەخشەکانی ئیمام خومەینی و ڕێبەری شەهید ئایەتوڵڵا ولعوزما خامنەیی (ڕەزای خوای گەورەیان لەسەر بێت)، مایەی پێزانین و ڕێزە.
ئەمڕۆ کە گەلانی جیهان لە ستەم و زۆرداریی حکوومەتی ئەمریکا و سەهیۆنیستە تاوانبار و لەناوبەرانی کشتوکاڵ و نەوە، بێزار بوون، هیچ ڕێگەیەک جگە لە جیهاد و بەرگری لە بەردەمدا نەماوە، و پایەداری لەم ڕێگەیەدا، سەرخستنی بەڵێندراوی خوایی دەکاتە بەشی تێکۆشەرانی ڕێگەی حەق: «...وَكَانَ حَقًّا عَلَيْنَا نَصْرُ الْمُؤْمِنِينَ» (2) (...و سەرخستنی باوەڕداران مافێکە لەسەر ئێمە) (قورئان، ڕۆم ٣٠: ٤٧).
ئێستا کە حیزبوڵڵای لوبنان وەک پێشەنگی گرووپە جیهادییەکان لە بەرامبەر هێرشی دڕندانەی ڕژێمی سەهیۆنی و پشتیوانانیدا، وەک تاشەبەردێکی پتەو ڕاوەستاوە، ئەم پایەدارییە بووەتە پەیامێکی ئیلهامبەخش بۆ گەلانی ئازادیخوازی جیهان لە ئاراستەی ڕزگاربوون لە ستەم و زۆرداریی خۆبەزلزانیی جیهانی و دەستنیشاندەکانی. بێگومان بەشێکی بەرچاوی ئەم دەستکەوتە گەورەیە قەرزاری ئارامگرتن، نەجابەت، فیداکاری و هاوڕێیەتیی خەڵکی لوبنان، بەتایبەتی ناوچەی باشوور بووە.
کۆماری ئیسلامیی ئێرانیش لە ئاراستەی ڕێبازی ڕێبەری مەزن و شەهیدی شۆڕش ئیمام سەید عەلی خامنەیی (ڕەزای خوای گەورەی لەسەر بێت)، بەرگریکردن لەم تێکۆشەرە ستەملێکراو و بەدەسەڵاتانەی کردووەتە سیاسەتی ستراتیژیی خۆی، و پاراستنی یەکپارچەییی خاکی لوبنان و کۆتاییهێنانی تەواو و بێ قەید و مەرجی دەستدرێژیی ڕژێمی سەهیۆنیی وەک یەکەمین مەرجی یاداشتنامەی کۆتاییهێنان بە جەنگی سەپێنراو لەگەڵ ئەمریکای دەستدرێژکاردا داناوە.
درود و ڕەحمەتی خوای گەورە لەسەر شەهیدان و بریندارەکان و خێزانە ئارامگرەکانیان، کۆچبەرانی ڕێگەی خوا کە بەرگەگرتنی ناخۆشییەکانیان لەسەر خۆیان ئاسان کرد. سڵاوی خوا لە ڕۆحی ئاسمانیی سەروەری شەهیدانی حیزبوڵڵا سەید حەسەن نەسروڵڵا و هەموو فەرماندە پێشینەکانی بەرگری و یارە شەهیدەکانی (ڕەزای خوای گەورەیان لەسەر بێت)، کە نەمامی بەرگریی ئیسلامییان کردە دارێکی ئەستوور کە اصلها ثابت و فرعها فی‌السّماء (ڕەگەکەی جێگیرە و لقەکانی لە ئاسماندان)، ئەو تێکۆشەرانەی کە بە جیهاد و بەرگریی خۆیان، شکۆ و سەربەرزیی لوبنانیان لە جیهانی ئیسلامدا بە دیاری هێناوە.
لە کۆتاییدا هیوادارم بە بەرەکەتی دوعای خێری سەروەرمان (عجّل‌الله‌تعالی‌فرجه‌الشّریف) جۆرەها سۆز و میهرەبانیی خوایی هەموو تێکۆشەران و شەهیدان و جانبازانی بەرگری و کۆچبەران و خێزانە ئارامگرەکانیان بگرێتەوە.
«وَنُرِيدُ أَنْ نَمُنَّ عَلَى الَّذِينَ اسْتُضْعِفُوا فِي الْأَرْضِ وَنَجْعَلَهُمْ أَئِمَّةً وَنَجْعَلَهُمُ الْوَارِثِينَ» (3)
و دەمانەوێت منەت بنێین بەسەر ئەوانەدا کە لە زەویدا بێهێز کراون، و بیانکەینە پێشەوا و بیانکەینە میراتگران. (قورئان، قەسەس ٢٨: ٥)
والسّلام علیکم و رحمةالله و برکاته
و سڵاو و ڕەحمەت و بەرەکەتی خواتان لەسەر بێت.
سەید موجتەبا حوسەینی خامنەیی
(1) سوورەتی تەوبە، ئایەتی ١٢٣
(2) سوورەتی ڕۆم، ئایەتی ٤٧
(3) سوورەتی قەسەس، ئایەتی ٥